saviminikut

Biilikorpassuit Nuummi aqqusinernit piiarneqassapput

Biilikut qimaannakkat kommunip isaterniarpai - piginnittut akiligassitsinnissartik naatsorsuutigissavaat.

Biilikut inuttaminnit pigineqarusukkunnaartut sumilu tamaani uninngatiinnarneqartut Nuummi takussaajunnaassapput.

Tamanna anguniarlugu biilikut, inatsisinik unioqqutitsinikkut sumi tamaaniisinneqartut, Kommuneqarfik Sermersuup Sanartornermut Avatangiisinullu ingerlatsiviata mannan qanoq iliuuseqarfiginialerpai.

- Illoqarfiup iluani biilikorpassuit takussunarluinnartut amerlaqaat. Illoqarfiulli iluaniinnaanngitsoq tamakku takussaapput aamma illoqarfik qimalaaginnarlugu tamakku inuttaminnik ilinnarneqartarput, Ingerlatsinermut Avatangiisinullu immikkoortortaqarfiani ingerlatsisoq, Frank Rasmussen oqarpoq.

- Biilikut sumi tamaaniittut ajornartorsiutaasullu 100-t missaanniittut inuttaannut peeqqugaluarlutigit qisuariarfigineqanngimmata namminneerluta assartorlutigit manna taakku passuppagut.

Piginnittut akiligassinneqassapput
Biilikut assartorneri ulorianarunnaarsinneqarnerilu kommunimut akissaajaataapput. Tamannalu pillugu kommunimit biilit inuttaat maanna paasiniarneqalerlutik.

- Biilikut sumut tamaannga iliinnarneqarlutik inuttaminnit qimanneqarsimasut inui kikkuunersut paasiniartarparput allagarsiinikkut. Inuttaat qisuarianngippata taava biilikut atorunnaarsimasutut nalileriarlugit igitassanngortittarpavut, tamatuma kingorna aserorterlugit ulorianarunnaarseriarlugit naqitsissussuarmik inikillisariarlugit Danmarkimut nassiuttarlutigit, Frank Rasmussen oqarpoq.

Biilikut ulorianarunnaarsinneqarneranni isaterneqarnerannilu motooriisa normui nassaarineqartarput, biilillu allattorsimaffiannut paasiniarneqartarluni biili kimit pigineqarnersoq. Taakkulu iluaqutigalugit biilit inuttaat kommunimit saaffigineqarnissartik naatsorsuutigisinnaavaat.

- Biili atorsinnaajunnaarpat inuttaanut akikinnerussagaluarpoq namminneerlutik biilertik eqqakkanut tigooraavimmut tunniukkiartorunikku, Frank Rasmussen oqarpoq.

Biilit qanoq avatangiisinut ulorianarunnaarsinneqarnissaat pillugu Eqqakkanik tigooraavik ilitsersuutinik peqarpoq, taamaalilluni biilip inuttaata nammineerluni ulorianarunnaarsinniarlugu suliarisinnaallugu imaluunniit illoqarfimmi biilinik suliaqartartunut tamanna imissutigisinnaallugu. Biilit ulorianarunnaasinneqarnerisa kingorna biilikut maleruagassat naapertorlugit Eqqakkanut Tigooraaviliaanneqarsinnaallutik.

Eqqakkanut Tigooraavimmit biilikut naliginnaasut kisiisa maanna sammineqarallarput, kingusinnerusukkulli biilik angisuut angallatikullu aamma passunneqartalissallutik.

Powered by Labrador CMS