aputaajaaneq
Biilertartup tupannermi kingorna kommuni qinnuigigaa
- Tupinnartuliaq, Liss Stenderip ullaaq Nuup qeqqanut ingerlaartilluni aqqusinermi aputit itisuumik itersanissimanerannik sangusaaleriasaarnini, taama oqaluttuaraa.
Aqqusernup sinaani inunnik biiliminik aporsinnginnera tupinnartuliaavoq. Assakaasut apummi sermertaqartumi itisuumi sangusaaleriasaartinneqarmata, taassuma biili aqussinnaajunnaavippaa.
Liss Stender ukiuni 30-ini Nuummi najugaqartoq, taamaalillunilu ukiukkut kigaatsumik ingerlanissap qanoq pingaartigineranik ilisimasaqarluartup, Sermitsiaq.AG-mut oqaluttuaraa:
''Inoqarsimagaluarpammi..''
- Ullaaq manna aqqusinermi itersatigut sermikkut sangusaaleriasaarpunga, biililu kaajallappoq. Arlaannik ajoqusertoqannginnera tupinnartuliaavoq. Tamanna Eqalugalinnguit eqqaani bussit unittarfiata nalaani angallaffiusumi pivoq. Inummik inersimasumik, meeqqamik imaluunniit biilimut allamut aporsimagaluarumami, Liss Stender oqarpoq, taanna nassuiaavoq akunnermut 30 kilometerersuinnarluni nassuiaavoq.
Taassuma aqqusineq sermiiarluarneqartarnissaanik kommunimut qinnuiginnippoq, taamaalilluni aqqutit itisuut peerneqarniassammata. Tamatuma saniatigut kommunip aputaajaanermut sipaarniartarneranik pasilliilluni ilisimatitsivoq.
Kommuneqarfik Sermersuumi ingerlatsinermut pisortap, Frank Rasmussenip, aamma Nuummi aputaajaanermut akisussaasup aputaajaanermut sipaaruteqartoqanngitsoq ilisimatitsissutigaa.
Aqqusernit ulorianartut salliutinneqartut
- Kisianni aputaajaanermi aqqusernit ulorianarunnaarnissaat salliutinneqartarpoq. Tamatuma kingorna sermiiaaneq aallartittarpoq, Frank Rasmussen oqaluttuarpoq.
Aamma atuaruk: Aputaajaasut pisortaat: Kalaallit Nunaanni najugaqarnerput eqqaamallugu!
- Sumiiffiit ilaanni ajornartorsiuteqartoq itigartitsissutigisinnaanngilara, taamaakkaangat suliaqartartut sermiiaanissaannik suliakkerneqartarput, ingerlatsinermut pisortaq oqarpoq, taanna isumaqatigiissutigineqartunut tunngatillugu aputaajaasut naammaginartumik suliarinninnersut nakkutilliisoqartarpoq.
Aqqusineq misissorneqartarpoq
- Uani suliami soorunami Eqalugalinnguit eqqaani aqqusineq misissorneqassaaq, ingerlatsinermut pisortaq naqissusiivoq, taassuma ukiormanna immikkut ittumik Nuummi apingaatsiarsimasoq maluginiaqquaa.
Atuaruk: Nuuk aputissaaleqinngilaq
Nuummi politiit pigaartuini pisortaq, Brian Thomsen, ''qujanartumik'' aqqusinermi itersisimasuni annertuumik pisoqarsimaneranik nalunaartoqarsimanngitsoq ilisimatitsivoq.
- Ukiunut siuliinut sanilliullugu ukiup imaalinerani amerlanerusunik saaffigineqanngilagut, taanna oqaluttuarpoq, taannalu ukiormanna annertuumik ajoqusertoqarsimatillugu eqqaasaqarsinnaanngilaq.
Malittarisassat malillugit ingerlagit
- Biilertut malittarisassat malillugit ingerlanissaat aqqusinermi angallannermut inatsimmut innersuussissaagut, taamaalilluni pisoq oqaatigineqartoq pinngitsoortinneqarniassammat, Brian Thomsen Sermitsiaq.AG-mut oqarpoq.
Januaarip qaammataani agguaqatigiisillugu Nuummi nalinginnaasumit tallimariaammik aputeqarneruvoq, Danmarks Meteorologiske Institutip kisitsisaataasa tamanna takutippaat.