se billeder
Bibi Chemnitzip rådhusi tiguarpaa
Københavnimi atisanik takutitsineq naggaserneqarpoq tallimanngormat unnukkut Bibi Chemnitzip Københavns Rådhusimi atisanik takutitsineranik
Københavns Rådhus atisanik nuannarinnittunik assiliisunillu ulikkaavippoq, atisanillu nuannarisallit 500 sinneqartut talllimanngormat unnukkut Bibi Chemnitzip Københavnimi atisanik takutitsinera takuniarpaat. Takutitsinerlu kinguaattooraluartoq isiginnaartut takutitsineq nuannaraat, Bibi Chemnitzip atisaliai ersaartaanneqartarput uinngiarsorfigineqartarlutillu, atisanillu takutitsisut 12-iupput. Atisaliai ilaatigut tassaapput tuluujuaqqat qarleeqqallu "puisip amianik allallit".
Atisat atoruminartuupput "street couture"-mik stil-eqartut, inuusuttut, pisuut pinnersullu piumasartagaat. Assersuutigalugu erinarsortartoq tusaamasaq Xander Bibi Chemnitzip tuluujuaraliaanik atorpoq, qanittukkut nuna tamakkerlugu tv-kut aallakaatitami Go´ Morgen Danmark-imi apersorneqarami.
Atisaliai nunani assigiinngitsuni tuniniarneqartarput soorlu Japanimi, USA-mi, Tysklandimi, Frankrigimi, Italiami, Danmarkimi Nunatsinnilu. Aappassaa 29-nik ukiulik Bibi Chemnitz Københavnimi atisanik takutitsinermi peqataavoq, taannalu atisaliortartunut peqataaffigalugu aningaasartuuteqartarnerit ilagaat.
– Atisanik takutitsineq ukiukkut Børsenimi takutitsinermit akisunerugunarpoq, atisanilli takutitsineq akilersinnaavoq, Københavnimi atisanik ilusilersuisartoq pisiniarfiutilillu Bibi Chemnitz oqarpoq.
Eqqortumik oqaatigerusunngilaa atisanik takutitsineq, 12-nik takutitsisoqarluni, nipilersuteqarluni, qullilersorluni kiisalu isiginnaartunut sassaallerluni qanoq akeqarnersoq, DR-ili sisamanngormat allappoq atisanik takutitsineq stylistit, make-up-imik taniisartut, takutitsisut akissarsiaat, qulliit, nipi DJ-lu kiisalu isiginnaartunut sassaallerneq ilanngullugit 500.000 koruunit angullugit akeqarsinnaalluartoq.
– Ukioq takutitsineq "Homesick", Børsenip initoqaanni ingerlanneqartoq, takutitsineq akisusimavoq. Aningaasartuutilli akilersinnaapput, pingaartumik aningaasaliisoqaraangat, Bibi Chemnitz oqarpoq, atisanillu mutinik ilisimasallit siunissaqarluarsoraat.
– Ippassaq unnukkut takutitsinermut kalaallit ilisimaneqartut pisiortortartullu qaaqqusimavakka. Allarpassuilli aamma atisanik nuannarisallit takkussimapput, Bibi Chemnitz oqarpoq.