Beyoncép qitittartuisut qitittarnermik sungiusaaneq

Nuummi akeqanngitsumik Hip Hop-ernermik workshopertitsisoqassaaq februaarip qulingani aqqarnganilu. Tassani sungiusaasuussaaq nunarsuarmi qitinnermik ilisimaneqarluartoq Tony Stone.

Tony Stone Los Angelesimi qitinnermik sungiusaasuuvoq, Beyoncé, LL Cool J, Diana Ross aamma Kelis suleqatigisareerlugit.

Tony So You Think You Can Dancemi aamma Danish Music Awardsimi koreografioreerpoq siornatigut, kingullermillu 2015-mi Nuummiilluni.

Nuummi qitittartut Qiajuk ukiut qulinngortorsiorlugit Nuummiissaaq, tassani akeqanngitsumik sungiusaassaaq. Meeqqat inuusuttullu aqqaneq-marlunnit 21-nut ukiulinnut Hip Hop-ernermut soqutigisalinnut sungiusaassaaq. Tassani ilaasut soqutiginnittut ’QITIK 2018’-mi, Katuami, takutitseqataassapput. Taanna Katuami apriilip 28-ani ingerlanneqassaaq.