Barrow 2016-imi Utqiaġvik taaguutigilerpaa
Illoqarfik ICC-p ataatsimeersuarfigisaa, aatsaat ukiut marluk matuma siorna taaguuteqqaatini utertippaa
ICC-p ataatsimeersuarnerata Utqiaġvikimi ingerlanneqarnera takussutissamigut naleqarpoq. Ataatsimeersuarnermi kingullermi ukiut sisamat matuma siorna suli Barrowimik taaguuteqarpoq.
Nuuk aamma Iqaluit Nunavumiittut assigalugit Utqiaġvik maanna inuit taaguutaannik taaguuteqarpoq. Kisianni Frobisher Bay Iqaluit taaguutigilerai 1987-imi aamma Godthåb 1996-imi Nuummik taaguuteqalersoq, Utqiaġvik aatsaat 2016-imi taama taaguuteqalerpoq.
ICC-p ataatsimeersuarnerani oqalugiartut arlallit taaguutaata allanngorneqarnera kulturikkut kingornussassanik piginnittunngornissamut alloriarnertut pingaarutilittut oqaatigaat.
- Utqiaġvimmi tamanna suliniut (taaguutaata allanngortinneqarnera, aaqq.) inuusuttatsinnit siulersorneqarmat tulluusimaarutigaara, Jim Stotts, Alaskami ICC-mi siulittaasoq oqarpoq.
Oktobarip sisamaanni innuttaasut taamani Barrowiusimasup allanngorneqarnissaa taasissutigaat. Inernera nikinngassuteqarpiarani 381-it akuersipput 375-it akerliullutik.
Piffik inupianut ukiuni 1.500-ni najugarineqarsimavoq. Aallaqqaammut tuluit Otkiawikimik taaguuteqqaataanit aallaaveqartumik taaguusersimagaluarpaat. Kisianni 1900-kkut aallartinneranni Barrow taaguutaalersimavoq.