Champions League
Barcelonami marluk ingerlalluarnerat Messip uternerata ajoqusersinnaavaa
Kisitsisit atorlugit nassuiaasiornerit takutippaat, Neymar aamma Suarez, Messi peqanngikkaangat arsarluarnerusartut, Maannali argentinamioq uterpoq
Lionel Messi qaammatini marlunni ajoquseqqanini peqqutigalugu arsaqataasanngereerluni FC Barcelonamut arfininngormat Real Madridimut El Clasicomi unamminerminni uterpoq.
Argentinamioq tusaamasaq isersimaqqaartartunut uteqqingajalerpoq Neymar aamma Suarez peqatigalugit, taakku marluullutik Messip arsaqataannginnerani arsalluavissornikuupput. Marlunngornermi Champions Leaguemi Romamut unamminermi argentinamioq isersimaqqaariaannaavoq.
Kisianni taakku marluk ingerlalluarnertik attatiinnarsinnaanerpaat, holdip tusaamasaanerpaartaa uterpat ininilu tigoqqikkumallugu?
Kisitsisit atorlugik nassuiaasiornerit takutippaat, Neymar aamma Suarez marluinnaatillutik Lionel Messi peqatigalugu pingasuunerminngaanniit ingerlalluarnerusartut.
Las Palmasimut septemberip naanerani unamminerminni argentinamiup seeqqumigut ajoqusernera sioqqullugu, Neymari pingasoriarluni målersimavoq aammalu ataasiarluni målertumut tunisisuulluni.
Luis Suarez suli annikinnerulaarpoq marloriarluni målersimalluni, talliamariarluni unamminermilu ataasiarlunilu målertumut tunisisuulluni.
Siukkanit marluk taamatut arsarsimanerat, Messi peqanngitsillugu allaaneroqaaq.
Uani unamminerni qulini Neymar aqqanilinnik målerpoq, arfineq-marloriarlunilu målertumut tunisisimalluni. Tunniussinerit ilaat unamminerni qulini Luis Suarezip aqqaneq-marloriarluni målernermut atorsimavai, uruguayermiorlu sisamariarluni målertitsisimalluni.
Suarezilli Real Madridimut isertitaa kingulleq Messip isereernerata kingorna pivoq.
Tassa taakku arsartartut tusaamaneqartut Barcelonap ligami aamma Champions Leaguemi isertitaani 27-iusuni 23-it marluullutik isertissimavaat.
Messilli uternera holdeqataasumit Ivan Rakiticimit eqqarsarnartoqanngilaq.
- Messi pingaarutilerujussuuvoq, qujanartumillu uagut unammisartoqatigaarput, Reuters naapertorlugu Rakitic oqarpoq.
- Tamatta ilisimavarput holditsinnut qanoq pingaaruteqartiginersoq.
Pineqartorlu nammineq aallarteqqinnissaminut qilanaarpoq, Real Madridimullu 4-0-mik ajugaanerminni uteqqikkami unammilluarpoq, tassani unamminerup naggataani Messi minutsini 34-ini kingullerni isersimavoq.
- Uteqqilluni arsaqqilerluni uitsaviunngilaq. Sapatip-akunneri arfineq-pingasut unammeqataanani sivisoorsuupput. Maannali uterpunga, holdillu ikiornissaanut piareerlunga, Real Madridimut ajugaanerup kingorna Messi taama oqarpoq.