Barcelona Champions Leaguekimit peeriaannaavoq

FC Barcelona kanngunarsangaarujussuartoq.

Spaaniami klubbit annersaata ilaa Champions Leaguekimi pissartanngortussanut piukkunneqartunut ilaasut Paris Saint-Germain-imut 4-0-mik ajorsarnerata kingorna ingerlaqqinnissaat qularnarsivoq.

Barcelona Frankrigip illoqarfiisa pingaarnersaanni ajugaaffigiterujussuarput, tamannalu arsaattartuinut klubbillu nakimaanneranut ajoqusiisimasinnavoq.

- Nassuiaruminaappoq. Unammineq aallartinneraniit torrallaarujussuarput. Unnuk uatsinnut ajorluinnarpoq, takuneqarsinnaavorli pitsaanerujuusut. Allatut oqaasertaleruminaatsippara, Barcelonap sungiusaasua pakatseqqaqaluni taama oqarpoq.

Sungiusaasoq ingerlalluartoq pakatseqqanissaminut peqqutissaqarpoq.

Ulluni tullerni unamminerup ingerlasimanera isiginnaaqattaaraluaruniuk unammilluarsimanermik takusassaqanngilaq.

Unamminerup immikkoortua siulleq naammassimmat Barcelona angummateriaannaasimangaluarpoq, unamminerummi immikkortuata aappaa allatut pisoqarsimasinngaaluarpoq.

Paris Saint-Germain-illu arsaannermik aqutsinertik attatiinnarsimavaat, arsaattartulli pikkorinnersanut ilaasut Lionel Messi, Luis Suárez Neymarilu arsartinnaveersaarluarsimavaat.

- Unammissatsinnut taakkua pingasut arsartinnaveersaarnissaannut periuusiliorsimavugut. Unammisartuutikka pikkoriffippassuaqarput allaat Barcelonap unammisartuinut sanillersiussinnaallugit, ullumili suna tamarmi iluatsippoq, PSG-iip sungiusaasua Unai Emery 3+-imut taama oqarpoq.

Angel Di Maria 29-inik ukioqalernini torrallaavillugu unamminermi isertitseqqaartuullunilu pingajuat isertippaa.

Julian Draxler PSG-mut nooqqammisoq unamminermilu arsarluaqisoq isertinneqartut aappaat isertippaa, unamminerup naammassinissaanut 20 minutsit kisinngoruttut Edinson Cavanip Barcelona kanngunarsarneqarnera naqissuserpaa.

Marsip arfineq pingajuanni unamminerup aappaa ingerlanneqassaaq Barcelonallu angummassinnaanersoq takorlooruminaappoq.

Champions League ingerlanneqartalermalli unammisartut arlaannaataluunniit 0-4 kinguaqqareerlutik unamminerni isertinneqartut katinneqarneranni comeback-ertoqarnikuunngisaannarpoq. Unai Emerylu qulakkeerinneqqasutut misigisimanngilaq

- Naluara naammannersoq. Camp Nou-mukassaagut Barcelonalu ataqqilluinnarlugu unammissallutigut. Taama unammissamaarpugut, kvartfinalimulli anngunnissatsinnut naammannersoq takujumaarparput, PSG-iip sungiusaasua taama oqarpoq.

Barcelonami sungiusaasuata nalunngilaa immikkorluinnaq pisoqassasoq ajutuuvissanngikkaanni.

- Uatsinnut ajornartorujussuuvoq. Unammisarfitsinni unammilerutta sapiitsuliortariaqarpugut. Sooq sapernassangami, Luis Enrique aperivoq.

Ottendedelsfinaalit ingerlanneqartup aappaani naligiiffiuneruvoq. Benfica unammisarfimminni Dortmund unamminerup ingerlanerani strafferlutik isertitsinngitsoortut 1-0-mik ajugaaffigaat,

Tyskit ajorsaraluarlutik ingerlariaqqinnissaminnut suli periarfissagissaarput.

/ritzau/