ukiup affaanut naatsorsuutit
BankNordik ukiup affaanut naatsorsuutit angusarissaartoq
Aningaaserivik 2017-mut ukiup affaanut naatsorsuutit saqqummiussaani sutigut tamatigut ineriartorfiusimasoq saqqummiuppaa
Bankip 2017-mi ukiup affaata siullianni naatsorsuutit saqqummiussai malillugit ingerlatsinermi angusarineqartoq 94 mio. kr-niuvoq, akileraarutissallu sioqqullugit angusarineqartoq 112 mio. kr-iulluni.
Kalaallit Nunaani immikkoortoqarfimmi akileraarutissat sioqqullugit 13 mio. kr-inik angusaqarfiuvoq, ukiup siuliani taamaalineranut naleqqiullugu angusarineqartoq 3 mio kr.-inik pitsaanerulluni.
Savalimmiut aningaaseriviutaat tusagassiuutinut nalunaarummi allappoq.
Siulersuisut iluarisimaartut
Angusat siulersuisut 'iluarisimaarnerarpaat'.
- 2016-imi Kalaallit Nunaanni naatsorsuutivut aatsaat taamma angusarissaarfiutigisimapput, 2017-imilu aamma ukiup affaata siullianni pitsaasumik ingerlaffiuvoq. Naatsorsuutitigut angusarineqartoq ilimagisatsinnit pitsaanerusoq naammaginarluinnartutut isigaarput, Kalaallit Nunaanni sullissaqarfik siuariartofissaqqissutut isigaarput, taamatullu pitsaasumik ineriartorneq Kalaallit Nunaannilu sullissinitta ingerlatiinnarnissaa pillugu erseqqisumik pilersaaruteqarluta, ingerlatsinermut pisortaq Árni Ellefsen tusagassiuutinut nalunaarummi oqarpoq.
BankNordikip ilanngullu paasissutissiaraa, ukiup affaata siuliannut naatsorsuutit sullissaqarfinni tamani sullissinerup annertunerulersimaneranik ersersitsipput.
- Erniatigut suli ilungersornartulimmiipput, tamannali sullissat amerlanerulernerannik aamma taarsigassarsisitsisarnerup annertusiartorneranik ilaatigut oqimaaqqatigiisinneqarsimalluni. Taarsigassarsititsisarnermi annaasaqaataasinnaasunik illuartitsisarnerup annertussusiat appasissumi naammaginartumilu inissisimavoq, aningaaserivik oqarpoq.