Bankimi sulisut bonusisillualaavittut

Sulisut aningaasaqarnermut sullitallu naammaginnisimaarnerannut angusaat pillugit aningaasanik agguaassisoqarnissaa bankimit nassuiaatigineqarpoq. Bankip uuttorneqarsinnaasumik angusassatut tunngavilersuutigisimasai eqqarsatigigaanni bankimi sulisut ataatsimoorlutik pissarsiarisinnaasaat 20.000 koruuninut killineqarsimavoq. Sulisunummi agguaanneqarsimasuni killigitinneqartumit 5.000 koruuninik inorsalaarlutik tunniunneqarsimapput.

Ataatsimoorluni suliniuteqarneq

- Ataatsimoortumik ajunngitsorsiarititat atorlugit sulisut aningaaseriviup piffissaq ungasinnerusoq isigalugu ataatsimoorluni suliniuteqarnermut atasumik tunniunneqartarput, bankip marsip 28-ani ileqquusumik ataatsimeersuarnissaminut qaaqqussutaani allassimavoq.

Ataatsimeersuarnermi bankimi siulersuisut qanoq akissarsiaqartitsinissamik siunnersuutigineqartoq, aktiaatillit isummerfigissavaat.

Isertukuluttoqassanngilaq

Akissartitsinerit suuneri apeqqutaatinnagit isertukuluttoqassanngitsoq Grønlandsbankip siulersuisuunerisa aalajangersimavaat.

Akissarsititsisarnermut politikki, ataatsimiititaliap siulersuisut pilersisimasaat suliaqarsimapput, "GrønlandsBANKEN-imi navialisinnaanerup isumannaatsumik aaqqissugaalluartumillu ingerlanneqarnissaa isumannaarniarneqarpoq", ullormi oqaluuserisassani allassimasoqarpoq.

Pisortamik soraartoqarneranik atatillugu pissarsiassat

Bankimi pisortaaneq Martin Kviesgaardi atorfeqartitaanermini qaavisigut sulisunut agguaanneqartartunut pinnaqataasinnaanngilaq. Aningaasarsiarititaasummi saniatigut soraarnermusiassat, ukiumoortumik akiliunneqarluni aallarsinnaanerit, bileqartitaaneq, telefoneqartitaaneq aammalu interneteqartitaaneq tunniunneqartarput. Soraarnermilu tunniunneqartussat affai aningaaserivimmi piginneqataassutaapput affaalu tigussaasumik aningaasaallutik katillugit qaammatini 0-24-ini aningaasarsiatut naleqartut. Pineqartut annertussusissaat tunniunneqarnissaallu assigiinngitsunik piumasaqaatitaqarput, ilaatigut aningaaseriviup qanoq angusaqarsimanera naatsorsuinermi atorneqartarlutik.

Navialiffiusinnaasut iluini pingaarutilimmik akisussaaffillit

Siulersuisuttaaq ukiumoortumik sulisut bonusisiarsartagaannut aamma pinnaqataaneq ajoraluartut, ukiumoortumik inuit marluk iluanaaruteqarluarsinnaapput. Tassaallutillu pisortaanerup tullia aammalu naatsorsuuserisut pisortaat "navialiffiusinnaasut iluini pingaarutilimmik akisussaaffillit" takussutissiami taama allassimasut, aktiaatilinnit akuerineqarnissaat ilimagineqarpoq.

- Taaneqartutulli inissisimasut nikerartumik akilerneqarsinnaapput ajungitsorsiatut ukiumut annerpaamik 100.000 koruuniusunik. Taamatut tunniussisinnaanermi apeqqutaaput suliat tunngaviusumit annertunerusimanerat, angusarissaartitseqataasimanerat aammalu aqutsinermi pitsaasumik takutitsisimanerat. Navialiffiusinnaasunut annertuumik akisussaatitaasut aningaasanik ajunngitsorsiarsitinneqarsinnaanerat uuttoqqissaarneqarsinnaasunik tunngaveqanngillat soorlu tuniniaarnerup imal. ingerlatsinerup iluini allaaveqartumik aammalu ajunngitsorsialiinermi aallaviuneq ajorlutik angusat qanoq issimaneri, akissarsiaqartitsinermut siunnersuummi allaqqasoqarpoq.

Qiimmassaasiissutitut ajungitsorsiarititat

Sulisulli allat periarfissaqarput ukiumiut immikkut 100.000 koruuninik bonusisinnaanermut. Aaqqissuussarlu "Qiimmassaasiissutitut ajungitsorsiarititat" taajuuserneqarsimavoq, ajunngitsorsialli tunniunneqassappata "navialiffiusinnaasut iluini pingaarutilimmik akisussaaffillit" piumasaqaataat assigivaat.

Akissarsisitsisarnermut atatillugu ataatsimiititaliap ilaasortaatitai pingasuupput: Siulittaasoq Gunnar í Liða, siulittaasup tullia Kristian Lennert siulersuisunilu ilaasortaq Yvonne Kyed.

Qinigassanngorteqqittoq

Qinigassanngortittut akornanni pineqartut qinerneqaqqittussatut inassutigineqarput: Siulittaasoq Gunnar í Liða, Lars Holst aammalu Christina F. Bustrup.