aningaasaliinerit
Bankimi pisortaq: Kalaallit Nunaat pillugu tutsuiginassuseq pisariaqartinneqarpoq
Aningaaseriviup pisortaa Martin Kviesgaard malillugu Grønlandsbanken siunissamut piareersimalluinnarpoq, Kalaallilli Nunaata siunissaata tungaanut qularuteqarnerulluni
Kalaallit Nunaanni aningaasaqarnikkut ilungersunartumik inissisimasoqaraluartoq Grønlandsbanken pitsaasumik angusaqarnini nalunaarutigaa.
Ukiup qaammataanut siullernut qulingiluanut siorna piffissamut tassunga naleqqiullugu akileraannginnermi naatsorsuutit 23,1 million koruuninik siuariarfiullutik 115,5 million koruuninut inerneqarput. Inernerit namminerisamik aningaasaatit ukiumut 19 procentinik erniaaqartitsipput. Taarsigassarsisitsinerit qularnaveeqqusiinerillu 249,7 million koruuninikinik amerlisimapput.
- Ukioq manna taarsigassarsisitsinigut qularnaveeqqusiinigullu qaffassimaneri iluarusunnartorujussuupput, naak qaammatit pingasukkaat pingajuanni immikkut appariarfiusimagaluartoq. Kalaallit Nunaanni inuiaqatigiinni siuariartorfiunngitsup nalaaniimmat iluarusunnarpoq, Grønlandsbankenip pisortaa Martin Kviesgaard oqarpoq.
Aningaaseriviup pisortaa malillugu kvartaalimi naatsorsuutinut pitsaasunut aamma sullitat tungaannut annertuumik eqeersimaarluni suliniuteqarneq peqqutaaqataavoq.
Nunatta siunissaa
Aningaaseriviup pisortaa malillugu Grønlandsbanken siunissamut piareersimalluinnarpoq, Kalaallilli Nunaata siunissaata tungaanut qularuteqarnerulluni.
- Kalaallit Nunaanni aningaasaleeriaaseq qereqqalluinnangajappoq. Kalaallit Nunaat pillugu tutsuiginassuseq pisariaqartinneqarpoq. Suliffeqarfiit aningaasaliissuteqarnissaminnut tunuarsimaarnerat isumakulunnarpoq. Tamatuma uppernarsaatigaa Kalaallit Nunaata maannakkorpiaq sammiviata qularutigineqarnera, tamannalu ineriartortitsinermut tutsuiginartunik patajaatsunillu sinaakkusersuinissat qulakkeerniarlugit nutaanik naalakkersuisoqalernissaanut tikkuussineruvoq ersarilluinnartoq, Martin Kviesgaard nassuiaavoq.
Grønlandsbankenip ukiumut 2014-imut naatsorsuutinut naatsorsuutigisani aalajangiusimavai, naliliillunilu naatsorsuutigisatut nalunaarutigineqarsimasut pappilissat nalingisa naleqqussannginnerini nalikilliliinnginnernilu 125-145 million koruunit akornanni qaffasinnerit anguneqarumaartut.