aqutsisut nutaat
Bank Nordik pisortamik nutaamik ilisarititsivoq
Nunani avannarlerni arnaq pissaanilik nutaaq, Stine Bosse, Bank Nordikkimi aamma nunatsinni selskabini arlalinni siulersuni siulittaasoq, ullumi savalimmiormiut aningaasaateqarfianni pisortamik ilisarititsivoq
Piffissami sivikitsumi pisortaanerugallartutut inissisimarsinnarluni, maanna Árni Ellefsen Bank Nordikimi pisortaaninngorpoq.
Nunani avannarlerni arnaq pissaanilik nutaaq, Stine Bosse, Tele-Postimi aamma Nunaoilimi siulersusuni siulittaasuusoq, pisortanngortoq Bank Nordikkip Kalaallit Nunaanni aamma Danmarkimi nunap ilaanik tigusinissaanut pitsaasuussasoq naatsorsuutigaa.
- Árni suleqatigiinnermik ilisimasaqarluartuuvoq, suleqatimilu pitsaanerpaaffii saqqummersittarlugit. Árni siuttoralugu Bank Nordik nutaaliamik aqutsisoqalissaaq, siulersuisunillu iliuusissatut pilersaarutit saqqummiunneqartunik naammassinnissaaq.
Aqutsisoqarfiup ukiuni aggertuni Bank Nordik Danmarkimi, Kalaallit Nunaanni, aamma Savalimmiuni atuisoqarlualernissaa sulissutigissavaa, kiisalu suliffeqarfinnit bankip atorneqarnerulernissaa, aammalu Kalaallit Nunaanni suliffeqarfiit isiginiarneqarnerunissaat siunissami allilertortussatut ilimagineqartut, siulersuisuni siulittaasoq Stine Bosse oqarpoq.
Atuaruk: Tele-Post kiisami pisortaanertaassaaq
Árni Ellefsen, uani allaaserisap ataatungaani assinga takuneqarsinnaasoq, pisortanit akuerisatut kukkunersiuisuuvoq aningaasaqarnermut pisortatut Bank Nordikkimi 2011-mi atorfinittoq. Siornatigut KPMG-mi Københavnimi aamma savalimmiormiut kukkunersiuinermut suliffeqarfianni Spektimi atorfeqarnikuuvoq.
Aalisartut aningaasarsiorfigilluarpaat
Savalimmiormiut aningaaseriviat karsiminni aningaasaateqarluarput, ilaatigut Savalimmiuni aalisarnermut immikkoortortaq peqqutigalugu.
Bank Nordik aningaaseriviup aaqqissuuteqqinneqarnera amerlanerusunik atuisoqalernissamut sammiveqassaaq. Aqutsisoqarfik ima isikkoqalerpoq:
- Aningaasaqarneq, Risk Management aammalu sulisoqarfiit sinneri Árni Ellefsen, pisortaanermit aqunneqassapput
- Suliffeqarfiit, pensionit aamma sillimmasiineq aqutsisoralugu John Rajani, aningaaserivimmi pisortaq
- Atuisut kiisalu tuniniaaneq aqutsisoralugu Turið F. Arge, atuisoqarnermut pisortaq
- Markets aamma private banking aqutsisoralugu Henrik Jensen, aningaasaliinermut pisortaq
- Akiitsut aamma filialsupport aqutsisoralugu Rune Nørregaard, akiitsoqarnermut pisortaq