inuussutissarsiorneq
Bank Nordik annertuumik iluanaaruteqartoq
Savalimmiormiut aningaaseriviata nunani tamalaani ingerlatsinermi angusani 34 procentinik pitsanngoriartippaa, siuariarnerlu Kalaallit Nunaanni aamma Danmarkimi ersarinneruvoq
Nalinik nalimmassaarinerit nalikilliliinerillu aamma akileraarutit pitinnagit, Bank Nordikip ukiumut naatsoorsuutaanni inernerit 214 millionit koruunit takutippaa, aningaaseriviullu naatsorsuutigisimasaatut tamanna inissisimavoq.
Ingerlatsinermi angusat 49 millionit koruuninik 194 millionit koruuninngorlutik annertusipput. Siuariarnerup annertunersaa Kalaallit Nunaanni aamma Danmarkimi takussutissaavoq.
Kalaallit Nunaanni periarfissanik takusut
- Kalaallit Nunaannit aamma Danmarkimi annertusinissamut periarfissaqarluarpoq, pisortaaneq Árni Ellefsen, tusagassiuutitigut nalunaaruteqarpoq.
Atuaruk: Banknordikip Kalaallit Nunaat ukkatarinerulerpaa
Kalaallit Nunaanni ingerlatsinermi angusat inernerisa takutippaat, 2014-imut sanilliullugu 2 millionit koruuninik pitsanngoriartoqartoq.
Niuernerup tungaatigut ineriartorneq ataatsimut pitsaaneruvoq, Kalaallit Nunaanni ukiuni kingullerni aningaasaqarnikkut ingerlanerliorneq eqqarsaatigissagaanni, Bank Nordik naqissusiivoq.
Maani annertusaarusuttut
- Kalaallit Nunaanni ingerlatsinerput annertusiartuinnartinniarlugu aamma ineriartortinniarlugu siunertarilluinnarparput, sullissat privatit aamma inuussutissarsiortut eqqarsaatigalugit, bankimi Nunatsinni pisortaasoq, Jón Brekku oqarpoq.
Savalimmiormiut aningaaserivia ukiumut naatsoorsuutit inernerini arlalinnik erseqqissaateqarpoq.
- Ingerlatsinermi angusat 49 millionit koruuninik pitsanngoriarput 194 millionit koruuninngorlutik
- Nalimmassaanerit nalikilliliinerillu 2014-imi 85 millionit koruuninit 2015-imi 20 millionit koruuninut appartinneqarput
- Aningaaseriviup taarsigassarsisitsinini 183 millionit koruuninik 2014-imut sanilliullugu annertusivaa
- Aningaaserivimmiititat 76 millionit koruuninik 2014-imut sanilliullugu amerlineqarput
- Aningaaseriviup akiliisinnaassuseqarnera 16,8 procentiuvoq, 2014-imi 14,8 procentiulluni
- 'Goodwill' 468 millionit koruuninik nalikillisinneqarpoq
Atuaruk: Banknordikip ukiuni qulini pisortaa tunuarpoq
Assit takukkit: Aningaaseriviup atisanik takutitsineq ussassaarutigaa