Ban Ki-moon Thorningilu nunatsinnukalersut

Statsministeri Helle Thorning-Schmidt Socialdemokratineersoq kiisalu Naalakkersuisut siulittaasuat Aleqa Hammond Siumumeersup FN-ip qullersaanera Ban Ki-moon sapaatip akunnera tulliani nunatsinnut tikeraartissavaat.

Kalaallit Nunaanni silaannaap kissatsikkiartornerata sunniutigisimasai tikeraarnermi takusassavaat, kiisalu Issittumi qanoq sunniisimanersoq takusassallugu.

Tikeraarneq marlunngornermi marsip 25-ata unnukkuani aallartissaaq, tassanngaannit aamma Aleqa Hammondip peroriartorfigisaa Uummannaq tikeraarneqassalluni. Helle Thorning-Schmidtip uia Stephen Kinnock Naalakkersuisut siulittaasullu inooqataa Tom Ostermann peqataassapput.

Silaannaap kissatsikkiartornerata inuiaqatigiinnut kinguneri aamma angalanermi takutinneqassapput.

Statsministeriaqarfik nalunaarpoq.

Silap pissusaa pillugu ataatsimeersuarneq
Tikeraarneq FN-ip silap pissusaa pillugu ataatsimeersuarnissaanut aallarnisaataavoq. Ataatsimeersuarneq USA-mi New York-imi septembarip 23-ani aallartissaaq, ataatsimeersuarnerlu Ban Ki-moon-imit aqunneqassalluni. FN-imi ataatsimiititaliarsuarni silap pissusaa pillugu ukioq manna ataatsimiittaqattaassaaq.

2015-imi Paris-imi COP 15-qarnissaani annertuumik isumaqatigiisiornissaq anguniarneqarpoq, tassani CO2-mik aniatitsisarnerup qaangerneqarnissaa anguniarneqassalluni. New York-imi ataatsimeersuartoqarnerani nunat tamarmik peqataatitaqarnissaat naatsorsuutigineqarpoq, tassani anguniakkat angorusutallu saqqummiunneqassallutik.

Ataatsimeersuartoqarnerani danskimik qitiusumik peqataasoqassaaq. DR-imi silassartitsisartoq Jesper Theilgaard tv-kkut silassartitsisartut qulit allat peqatigalugit silap pissusaanik ilisimasatik saqqummiuttassavaat.

Nunarsuup ilaani silaannaap pissusaa maannakkut qanoq isikkoqarnersoq saqqummiisoqartassaaq, Jesper Thielgaardillu europap avannaani silap pissusaa saqqummiutissallugu.