Overskudsforretning
Bamse 5 koruuninut
Arfininngorneq naallugu Nuuk Centerip silataani niuffattoqarpoq, tassani meeqqat qanorluunniit ukiullit pinngussaminnik tuniniaallutik - iluatsilluartorlu sapaammi nanginneqassaaq
Ippassaq arfininngornermi Nuuk Centerip saavani niuffattoqarpoq, meeqqat pinnguatoqqaminnik meeraqatiminnut naammaannartunnguamik akilerlugit tuniniaallutik.
Pinngussat 2, 5 aamma 10 koruuninik akilersillugit ulloq naallugu tunineqartarput, tamannalu pivoq nerrivinni Nuuk Centerip saavani iliorarneqarsimasuni. Ulloq naallugu nuannisartoqarpaluppoq. Meeqqat pinnguartaaminnik pinnguarput, nuannaarutigalugulu meeqqat allat pinnguatoqqatik atorsinnaammatigit.
Ullumi sapaammi meeqqat tuniniaanerat nanginneqaqqissaaq, meerarpassuit pinngussaminnik tuniniaassallutik kaasarfimmiussarsiniarlutik.