Savalimmiut
Bakkafrost aktiaatilinnut milliardit affaannik akiliuteqarpoq
Savalimmiuni kapisilinnik tunisassiorfiit annersaat, Bakkafrost, akileraareernermi 511 millionit koruuninik sinneqartooruteqarpoq, naak suliffeqarfik tunisassianik piareeriikkanik sinneqartoorniarnerminik unammillernartoqartitsigaluartoq
Bakkafrostip sulisuisa 300-t affaat tunisassiorfimmi Runavikimi sulisut soraarsinneqarnerannik ukioq aallartippoq. Kapisillit akiisa appasinnerannik unammillernartoqararluartoq Bakkafrost 2017-imi milliardit affaannik sinneqartooruteqarpoq.
Bakkafrost aktia ataaseq 10,50-nngorlugu iluanaarutinit akiliuteqarpoq. Tamanna aatsaat taama qaffasitsigaaq, nalingalu februaarip 22-anni 403,6-imut qaffappoq, Bakkafrost aktianilu qaffasinnerpaanngorluni.
- 2017-ip affaani siullermi kapisillip akia aatsaat taama qaffasitsigaaq, kisianni ukiup affaani kingullermi appangaatsiarpoq. Unammilligassat amerlanikuupput, kumaat aamma ILA. Pitsaasumik sinaakkuteqarnerup pingaassusaa annertunaarneqarsinnaanngilaq, Regin Jacobsen, Bakkafrostimi pisortaq oqarpoq.
Naleqarluartoq
Suliffeqarfiup suliai naleqarluartut suliffeqarfimmut pitsaasuusut, Regin Jacobsen oqarpoq.
Bakkafrostip kapisillit nammineq tukertittarpai tunisassiatullu suliarisarlugit. Tukertitsivik ingerlatsinermi 1.233 millioninik 2017-imi sinneqartooruteqarpoq, 2016-imi 1.114 millioninik.
Ukiuni kingullerni Bakkafrostip tunisassiani piariikkani sinneqartooruteqarnissani unamminartissimavaa. Ingerlatsinermut sinneqartoorut 2016-imi 201 millioniupput, 2017-imilu 75 millioninut appariarluni.
Angusat pitsaasut pissutigalugit siulersuisut apriilip 13-anni 2018-imi ataatsimiinissamut siunnersuuteqarniarput, aktiaatinit 513 millionit akiliutigineqassasut. Taakkulu aatsaat taama amerlatigipput.