Bagger: Atuarfiit ilinniartitsisutut ilinniarsimasunik 246-nik amigaateqarput

Ukiumi atuarfiusumi 2017/2018-imi ilinniartitsisut ilinniarsimasut nuna tamakkerlugu 246-t pisariaqartinneqarput

- Ukiumi atuarfiusumi 2017/2018 ilinniartitsisut ilinniarsimasut nuna tamakkerlugu 246-t amigaatigineqarput. Ilinniartitaanermut Naalakkersuisoq Ane Lone Bagger IA-meersup Sofia Geislerip paragraf 37 atorlugu apeqquteqataanut akissummini ilisimatitsivoq.

Kisitsit tamanna nassaarineqarpoq nunatsinni atuarfinni tiimit sulivallaarfiusut timelærerillu qassit atorneqarsimanersut katinnerisigut. Inerniliussarineqarporlu ilinniartitsisutut ilinniarsimasut nuna tamakkerlugu 246-t amigaatigineqartut.

Ukiut qulit tulliuttut

Ilinniartitaanermut Naalakkersuisuusimasoq Doris J. Jensen naalakkersuisuunermi nalaani ukiut qulit qaangiuppata nunatsinni ilinniartitsisunik 300-nik amigaateqassasugut aapriilimi nalilerpaa. Ane Lone Baggerilli akissutaa naapertorlugu taamaattoqassangatinneqanngilaq.

Taanna allappoq ukiuni qulini tullerni ilinniartitsisutut ilinniarsimasut amerlassusaat nikissanngitsoq, tassa 246-t amigaatigineqassasut. Kisitsilli nangaanartoqarpoq, atuarfeqarnerup aaqqissuuteqqinnerani tiimit atuarfiusut amerlisinnaaneri, ilinniartitsisunngorlaat amerlisinnaaneri aamma avataaneersunik ilinniartitsisoqarnerulersinnaaneq eqqarsaatigalugu.

Akissummi ilanngunneqarsimavoq ukiuni tullerni qulini ilinniartitsisut katillugit 260-it soraarninngorumaartut. Ilinniartitsisutullu ilinniakkaminnik naammassinnittartut ukiumut 36-iusut. Kisitsit taanna ukiuni tullerni qulini allanngussangatinneqanngilaq.

Powered by Labrador CMS