nunani tamalaaneersut unammiuaarnerat
Badmintonimik piukkunnaatillit angusarissaartut
Savalimmiuni inuusuttut nunanit tamalaaneersut sapaatip akunnerata naanerani unammiuaarneranni Badminton Kalaallit Nunaat nivissanik sisamanik piukkunnaatilinnik peqataatitaqarpoq
Badmintonernermik piukkunnaateqarluartut Tina Amassen Rafaelsen, Karolina Josenius, Milka Brønlund aamma Julia Thomsen sapaatip akunnerata naanerani Savalimmiuni inuusuttut nunanit tamalaaneersut unammiuaarneranni peqataapput.
Nivissat angusarissaarput unammissutillu ilaanni ajugaasarlutik.
Medaljet arlallit
Taamaasilluni Milka Brønlundip, qaammammi kingullermi Arctic Winter Gameseqarnerani pingasoriarluni kuultinnattup, U17/U19A-mi arnat kisimiillutik unammineranni Juila Thomsen 15-21-mik, 21-9-mik 21-17-imillu ajugaaffigaa.
Tina Rafaelsen nivissat U15A-t kisimiillutik unammiuaarneranni bronze-nappoq, Karolina Joseniusilu peqatigalugu U15A-mi iligiiaarluni unamminermi kuultinnappoq, savalimmiormiut ajugaasussatut ilimagineqarnerpaat 21-10 aamma 21-10-mik ajugaaffigalugit.
Tina Rafaelsenili arnat angutillu iligiiaarlutik unammiuaarneranni finalimi islandimiunut ajorsarpoq 21-18-imik, 16-21-mik aamma 19-21-mik. Tinap savalimmiormiu Hákun unammeqatigaa.
Unammeqataaffissaq tulleq
Savalimmiunut unammiartornermi Ib Hansen holdlederitut Rune Svenningsenilu sungiusaasutut peqataapput.
Badmintonimik kattuffiup unammeqataaffigisassaa tulleq tassaavoq Nap 2016, tassanilu badmintonimik piukkunnaateqarluartut arfineq-pingasut peqataassapput. Ukioq manna taanna Islandimi Akranersimi juulimi ingerlanneqassaaq.