B-67: Timersortartut ikiaroornarmut misissortittalerlik

B-67, Qaqortumi GM-ip nalaani hashimik kanngunartuliamit eqqugaasoq, timersortartut akornanni hashimik atuinermut akiuiniaqataanialerpoq. Peqatigiiffiup siunnersuutigaa timersortartut ikiaroornartumik atuisuunermut misissorneqarsinnaanermut pisussaaffilerneqassasut.

Arsaannermi GM-ertoqarnerata nalaani B-67-meersut marluk paasineqarput ikiaroornartumik hasimik anngiortumik Qaqortumut nassarsimasut. B-67ip najugaqarfiani politiit misissuineranni hashi annertunngitsoq aamma aningaasat arsaarinnissutigineqarput.

B-67-meersut maanna politiini ikiaroornartulerisut, namminersorlutik oqartussani pitsaaliuinermut immikkoortoqarfimmi Paarisami sulisut aamma GIF oqaloqatigisimalerpaat. B-67 siunnersuuteqarpoq timersortartut ikiaroornartumik atuisuunersut misissorneqartalissasoq.

- Taamatut missuisarnissaq aningaasartuutinik nassataqarpoq. B-67-miillu neriuutigaarput suliniummi klubbinut peqataaniartunut GIF aningaasaliisinnaassasoq. GIF tapiinianngippat B-67 piumassuseqarpoq aningaasartuutinik nammineq matussusiinissamut. Aningaasaativullu killeqarmata neriuutigaarput GIF tapiissuteqarsinnaajumaartoq, B-67-mi siulersuisuunerit sinnerlugit Christian Laursen nalunaarpoq.

B-67-ip siunnersuutaa malillugu timersortartut ikiaroornartumik atuisuusinnaanermik misissorneqarnissamut akuersisimasut kisimik pissartanngorniunnernut peqataasinnaassasut.