u8-t arsaannerat
B-67-ip meerartai saperneqarput
Islandimi unammiuaarnersuarmi U8-mi arsaattartut puljeminni ajugaallualaavipput
Sapaatip akunnerani uani B-67-ip U8-mi arsaattartui Islandimi unammiuaarnersuarmi peqataapput, tassanilu nunappiaqqat 1.800-t peqataapput.
Unammiuaartut pikkorissusaannut immikkoortiterneqarsimapput, A-rækkimiittut tassaallutik Islandimi klubbit sukalanerpaat. Immikkoortiterinerillu række H angullugu amerlassuseqarput.
Qaffatsinneqarput
B-67-imeersut C-rækkimut inissinneqarsimapput, islandimiunut arsaattartunut sanilliullugit qanoq kakkatsiginersut ilisimaneqanngimmat.
Unammiuaarnerup aallartinnginnerani IA Akranesimeersut A- aamma C-holdi sungiusaatigalugu unammivaat. Tassani B-67-imeersut A-holdimut 1-1-imik angusaqarput, C-holdimullu unammigamik 8-0-mik ajugaallutik. Taamaattumik B-rækkimut qaffatsinneqarput.
B-67-ip puljemini tallimanngormat pingasorilarluni unammivoq. Siullermik Fram 7-0-mik ajugaaffigaat. Unamminerup aappassaani Sjarnan 8-2-mik ajugaaffigaat. Unamminermilu kingullermi Trottúr 8-0-mik ajugaaffigalugu.
Puljemi ajugaapput
Taamaasilluni B-67 puljemini ajugaallualaavippoq.
– Nukappiaqqat tkutippaat A-rækkimi unammisinnaalluarlutik, tamannalu uppernarsarneqarpoq Akranesip A-holdianut sungiusaammik unammineranni. Taamaattumik uggornarpoq A-rækkimut inissinneqarsimanngimmata. Unamminerni siullerni pingasuni takusinnaavarput kakkassutsimikkut assigiinngitsorujussuusut. Neriuppugut unamminissani tullerni akiorneqarnerujumaarluta, Ingo L. Bisgaard sungiusaasoqatigiinneersoq tikkuaavoq.
Unamminerit tallimat
Arfininngornermi sapaammilu tallimariarlutik unammissapput, B-rækkimi puljemi ajugaasut allat unammineqassallutik.