arsaanneq
B-67 GM-imi ajugaavoq
Iligiit Nuummeersut N-48-mut Ilulissaneersunut ajugaapput
B-67 Nuummeersut isikkammik arsaannermi Nunatsinni pissartanngoqqipput.
Sapaammi unnukkut klubbip illoqarfiit pingaarnersaanneersup N-48 Ilulissaneersut finalimi 3-1-imik ajugaaffigaat.
B-67-ip illersuisuisa Niels Svane, Anders Petersen aamma Norsaq Mathæussen tamarmik immikkut isertitsimmata qujaffigisinnaavaat, Markus Jensenilu N-48-mi kisimi isertitsisuuvoq.
Nuummeersut ajugaanerminni GM-imi aqqaneq-aappassaanik pissartanngorput, tulleriisiinnarlugulu tallimassaanik pissartanngorlutik.
Isertitsisaqattaartut
IT-79 aamma G-44 akornanni bronzinnanniuttoqarpoq. Tassanilu IT-79 6-1-imik ajugaavoq.
IT-79-imi arsartut Julius Motzfeldt aamma Kuluk Ezekiassen tamarmik ataaseraarput, Malik Juhl aamma Jakob Fleischer marloraarlutik.
Kunuuteeraq Isaksen G-44-mi kisimi isertitsisuuvoq.