AWG: Timersortartut misigisaat atuakkit
Ulluni arfineq-marlunni Artic Winter Gamesimi timersuutit assigiinngitsorpassuit unammissutigineqareerlutik arfininngormat naggataarnersiorneqarpoq.
Kalaallit timersortartut 100-t sinnillit Canadami South Slavemi Artic Winter Games peqataaffigaat.
Canadamilu Artic Winter Gamesip arfininngornermi naggataarnersiorneqarnerani inuppassuit nuannapput.
Kalaallit peqataatitaat Sermitsiaq.AG-mit oqaloqatigineqarput. Taakku Arctic Winter Gamesimi suut misigisimaneraat uani atuakkit.
Annelise Christoffersen, volleyball:
- Unamminerpassuit nuannarinerpaavakka. Unamminerit arlallit ajorsafigaagut, kisianni misilittagaqarlualerpugut.
Bruno Pike, nerrivimmi arsaararneq:
- Taasinnaasakka amerlagaluaqaat, amerlasuunilli ikinngutitaartorsimavunga. Nunavummeersunik arlalinnik ikinngutitaarpunga. Illoqarfiit assigiinngitsut kulturillu nutaat takuneri aamma nuanneqaat, 16-nik ukiulik nerrivimmi arsaarartartoq oqarpoq.
Nikoline Sigurdsen, kulturi:
- Isiginnaangassiatta takutinnera nuannarinerpaavara. Isiginnaangassiaq Fort Smithimi nunat allat ilagalugit takutipparput.
Alfred Lindenhann, Dene Games:
- Pingasuupput. Ilikkalu Hand Gamesimi Pole Pushimilu ajugaangatta aammalu dommeriniit takutitsilluarnerpaatut toqqagaangama. Arfineq-pingajussaanik Arctic Winter Gamesimi peqataavunga. Peqataaffiginikuusanni Hay River illoqarfiit minnersaraat, illoqarfimmimi arlaannukarniaraanni ingerlannaq apuunneq ajornanngilaq
Aputsiaq Andersen, futsal:
- Futsalimik unammiuaarnermi pissartanngorniutivinnermilu ataatsimik isertitaqarnera nuannernerpaavoq. Pissartanngorniutivinnermi isertitsilluni nuanneqaaq.