Arctic Winter Games

AWG2016 pillugu tallimanngorpat saqqummiineq

Arctic Winter Games 2016-ip nittartagaa ammarneqassaaq kiisalu ilisarnaatitut takussutissaasussap maskottip atia saqqummiunneqassalluni

Christian Fleischer Rexip maskotsip isikkussaa titartarpaa

Arctic Winter Games 2014-ip marsip qaammataani ingerlanneqarnerani, AWG2016-imi Kalaallit Nunaat katersuiffiusussatut pisortatigut nalunaarutigineqarpoq, tamannalu soqutiginnittunit tamanit Katuami annertuumik persuarsiutigineqassaaq.

Tallimanngorpat uani sapaatip akunnerani ingerlanneqassaaq.

- Ulloq taanna pisussat piareernissaat ulapputiginikuuarput, AWG2016-ilu pillugu oqaluttuarnissarput takutitsinissarpullu qilanaaralutigu. AWG-p anersaavani pitsaanerpaamik takutitsiniarluta neriuppugut ukiut pissangaffiusussat marluk aallartinnerisa persuarsiutiginissaannut amerlasuut peqataajumaartut, General Manager Maliina Abelsen oqarpoq.

2002-mi Kalaallit Nunaata siullerpaamik AWG-mik aaqqissuussinera eqqaaniarlugulu, AWG2016-mi pisussanik saqqummiinissamut, innuttaasut tamarmik nuannersumik ullorsioqataanissaannut aaqqissuisunit qaaqquneqarput.

Ullorsiornermi aliikkusersuisoqassaaq, oqalugiartoqassalluni, pikkunartunik eqquiniaasoqassalluni, saqqummersitsisoqassallunilu timersuutit nutaat misilinnissaat periarfissaqassaaq. Ulloq taanna AWG2016-ip nittartagaa ammarneqassaaq kiisalu ilisarnaatitut takussutissaasussap maskottip atia kiisalu AWG2016-mik illersuisussat (ambassadørit) siulliit saqqummiunneqassalutik.

Persuarsiorneq naggaserlugu, Maaji Nuan AWG2016 peqatigalugu timersortartorpalaartumik aaqqissuussilluni, Katuamiit nalunaaqutaq 18.30 aallaartittumik arpaliuutsitsissaaq.

Powered by Labrador CMS