AWG2016 aamma Ilisimatusarfik suleqatigiinnissamut isumaqatigiissuteqartut

Ilisimatusarfimmi ilinniartut Arctic Winter Games 2016 pillugu suliaqarnermik misilittagaqarnissaminnut maanna periarfissaqalerput.

Ilisimatusarfik kiisalu Arctic Winter Games 2016 isumaqatigiissuteqarnerisigut, ilinniartut namminneq Arctic Winter Games 2016 pillugu suliaqarnermikkut, suliariniakkamut pingaarutilinnik pilersitseqataasinnaalerput.

Isumaqatigiissutip imarisaa naapertorlugu, ilinniartut ilaatigut issittumi nunat pillugit immikkut sammisaqarlutik saqqummersitsisinnaassapput, tusagassiortunngorniartullu Arctic Winter Games 2016 pillugu allaaserisanik Arctic Winter Gamesip nutaarsiassanik naqitassiarisartagaani Ulu Newsimi ilanngutassiisassapput.

- Instituttit ilinniartullu Arctic Winter Games 2016 pillugu suleqataalernerisigut, ilinniartut ilinniarnerminnut pingaarutilinnik iluaqutigisinnaasaminnillu attaveqaqateqarsinnaalerlutillu misilittagaqarsinnaalerput kiisalu suliaqarsinnaalerlutik, Ilisimatusarfillu nunat tamat akornanni kulturikkut suleqataanissaminut qilanaarpoq, ilisimatusarfimmi rektori Tine Pars oqarpoq.

Instituttini assigiinngitsunik suliaqartarnerup saniatigut Ilisimatusarfiup illutaa Arctic Winter Games 2016-imut atatillugu pingaarutilinnik aaqqissuussiviussaaq. Arctic Winter Games 2016-ip ingerlannerata nalaani Ilisimatusarfimmi ilinniartitsisoqassanngikkallarpoq, atortorissaarutitigut periarfissat soorlu saqqummersitsinernut, oqalugiarnernut allanullu aaqqissuussanut atorneqarsinnaaniassammata.