kinguuaattoornerit

AWG-p pilersaarutaa nutaaq imaappoq

Nuummi arfininngorpat silarlunnissaanut, canadamiut aamma alaskamiut ingammik eqqugaassapput. Timmisartut attartorneqartut Canadamit aallartussat amerlanerit kinguartinneqarput. Illuatungaanilli peqataasut Kangerlussuarmi unnuisussaarpasinngillat

Kangerlussuarmit Nuummut pilersaarutaasumik timmisartuussinissaq, peqataasunik 1.259-inik Yukonimit, Alaskamit, Alberta North aamma Northwest Territoriesimit arfininngorpat assartuinissaq, Nuummi nittaalluni anorersuarnissamik ilimasaarummut eqqorneqarput.

Sila pissutigalugu pilersaarummik nutaamik ingerlatsisoqarnissaa, Arctic Winter Gamesip allattoqarfiata ippassaq unnukkut nalunaarutigaa.

Alaskamiut aamma canadamiut kinguartinneqarput
Peqataasussat Alaskameersut Canadameersullu pilersaarutaasumit kingusinnerusukkut Kangerlussuarmut tikisinneqarnissaat pilersaarutaalerpoq.

Timmisartunit qulinit attartorneqartunit, canadami nunap ilaaneersunik aamma Alaskameersunik angallassisussanit, arfineq-marluusut sivisunerulaamik uninngatinneqarnissaat iluatsippoq.

Canadamiut ilanngunneqanngitsut
Air North Yukonimeersut taamaallaat nalunaarutigaat, timmisartuussinissamut pilersaarutitik malittariaqaritsik.

Yukonip timersortartui nalunaaqutaq 9.15 ssmms 11.15 arfininngornermi ullaakkut Kangerlussuarmut tikissapput. Sinneri arfininngornermi kingusinnerusukkut aamma sapaammi unnuakkut aatsaat tikissapput.

Anorersuaq sivikinnerusoq
Nuummi anori qujanartumik ualikkut sakkukilliartornissaanik isikkoqarpoq, arfininngorpat nalunaaqutaq marlup missaani - anori apeqqutaalluni - Air Greenlandip Kangerlussuup Nuullu akornanni timmisartuussinissarpassuani aallartissavai.

Taakku timmisartuussinerit unnuamut aamma sapaatip tungaanut ingerlassapput, Kangerlussuarmit timmisartuussineq kingulleq sapaammi 18.35 pissaaq, Kangerlussuarmi mittarfimmi pisortaq Rita Müller ilisimatitsivoq.

Unnuinissaq pisariaqanngitsoq
Taamaattumillu aaqqissuisut ernumassutigisaattut peqataasussat Kangerlussuarmi unnuinissaat pissanngilaq.

- Unnuinissaanik isikkoqaleraluarnerata kingorna, unnuinnginnissaat nuannaarutigaarput. Unnuinissamut suna tamaat piareersarlugu aallartikkaluarparput, qujanartumilli unnuinngitsuulerput, Rita Müller oqarpoq.

Kingusinnerusukkut ammaanersiorneq
Taarsiullugu peqataasunut Kangerlussuarmi Hotel Umimmakumi qasuersaarfissanik, siniffinnik, nerisaqarnissamut aamma bussiunneqarnissamut piareersaasoqarpoq.

Nuummi ammaanersiornissaq nalunaaqutaq 20.00-mut kinguartinneqarpoq, Nuummut tikittut kingulliit peqataasinnaaniassammata.

Saamit aamma russit Kangerlussuarmut tikittut
Tamatumalu aamma kinguneraa, Dash 8-mik timmisartuussinerit 38-iusussaagaluit 23-iinnanngortinneqarnerat.

Saamit peqataasut aamma Ruslandimi Yamalimeersut pilersaarutit malillugit Kangerlussuarmut ullumi tikipput, Air Greenlandimullu ilaallutik pilersaarutit malillugit Nuummut ingerlaqqissapput.

AWG pillugu kingulliit:

Inuusuttut Arctic Winter Games sioqqullugu pikkorissarneqartut

Anorersuarnissaanik ilimasaarisoqarnerata AWG-programmi kinguartippaa

Video takuuk: Inuusuttut piukkunnaatillit AWG-show sioqqullugu piareersarput

Powered by Labrador CMS