Arctic Winter Games

AWG ataatsimuussusermik misigisimalersitsisartoq

Nunat tikeraartitsisut Arctic Winter Gamesimik ingerlatsinermikkut iluaqutissarsiarisartagaat nalunaarusiami nutaami takutinneqarput

AWG2016-ip pisortaata Maliina Abelsenip inuiaqatigiit Arctic Winter Gamesimik aaqqissuisuunermikkut sunik iluaqutissarsiaqartarnerannik nalunaarusiaq nutaaq naammagisimaarluarpaa.

The Arctic Winter Games International Committeep (AWGIC) misissuineq nutaaq tunngavigalugu Arctic Winter Gamesip inuiaqatigiinnut unammiuaarnernik aaqqissuisuusunut pingaarutaanik nalunaarusiaq sapaatip-akunnerani matumani siusinnerusukkut saqqummiuppaa. Nalunaarusiaq taaguuteqarpoq “The Impact of the Arctic Winter Games: A Social Capital Perspective”

AWG2016-imi tusagassiorfinnut nalunaarummi nalunaarusiamit oqaaseqaatit toqqakkat naapertorlugit Arctic Winter Games:

“nammineq najukkap avataani inuiaqatigiinni pissutsinik paasisaqarnerulersitsisarpoq issittormiullu kulturiannik ataqqinnilersitsilluni”,

“Innuttaaqatigiittut ataqatigiinnermik pilersitsisarpoq ataqatigiinnermillu kajumissaarinermik anersaaqarneq pilersarpoq”,

“namminneq kajumissutsiminnik sulerusuttunik pilersitsisarpoq”

“inuiaqatigiinni siunissami aaqqissuussat peqataaffigerusulertarpakka”.

- Arctic Winter Gamesip timersortartunut, sungiusaasunut kulturilu pillugu sulialinnut sunniuteqartarnera paasinarluarpoq. Inuiaqatigiit unammiuaarnernut tikeraartitsisutut akisussaasuusut ajunngitsorsiarisartagaat nalunaarusiami uani erseqqissarneqarput, AWGIC‐mi siulittaasoq, Jens Brinch, tusagassiorfinnut nalunaarut naapertorlugu, oqarpoq.

Aqutsinermut tunngasumik kiisalu inunnik isumaginninneq peqqinnissarlu eqqarsaatigalugit inuiaqatigiit iluaqutaasinnaasunik qanoq naatsorsuuteqarsinnaanerat, nalunaarusiami soqutiginartumik ilanngunneqarput. Aningaasaqarnikkut timersornikkullu sunniutit saniatigut unammiuaarnerit aamma inuiaqatigiit akornanni assigiinngitsorpassuartigut pissarsiaqaataasumik kinguneqartarpoq, naliliivoq.

Dr. Sam Lankfordip kiisalu World Leisure Association inuiaqatigiit Arctic Winter Gamesimik aaqqissuussillutik tikeraartitsisuusut isumaginninnikkut ajunngitsorsiarisartagaat, nalunaarusiami saqqummiuppaat. Dr. Lankfordip suleqataasalu aamma unammiuaarnerit timersortartunut, sungiusaasunut kulturikkullu sulialinnut peqataasunut 1998‐imiit 2002‐imut kiisalu 2010‐imiit 2014‐ip tungaanut unammiuaartarnerni sunniutigisartagaat marloriarlutik paasisassarsiorfiginikuuaat.

- 2016‐imi Arctic Winter Gamesip ingerlanneqarnissaanut takorloorneqarpoq, timersortarneq kulturilu inuiaqatigiinnit ataatsimoorluni persuarsiutigineqassasoq, issittumi sanilitsinni inuiaqatigiinnut atassuteqarnerit nukittorsarneqarnissaat, nammineq kajumissutsimik suleqataasarneq pillugu ilisimasat annertusarnissai pisinnaasanillu ineriartortitsinissaq. Taamaammat nalunaarusiaq paasisallu soqutiginneqaluta tiguagut, AWG2016‐imi pisortaq, Maliina Abelsen, tusagassiorfinnut nalunaarut naapertorlugu, oqarpoq.

Arctic Winter Games tassaavoq timersortartut avannarpasissumi issittumilu najugallit nunanit sumiiffinniillu assigiinngitsuneersut unammiuaarfigisartagaat.

Unammiuaarnertigut sumiiffinni assigiinngitsuni timersuutit siuarsarneqartarput, timersortarnerup pitsaaqutaanik nittarsaasoqartarpoq, suleqatigisinnaasanik atassuteqartoqalertarluni kiisalu kulturimik pingaartitanillu nittarsaassisoqartarluni.

Unammiuaarnerit 24‐issaat Kalaallit Nunaanni, Nuummi 2016‐imi marsimi ingerlanneqassaaq.

Maliina Abelsen AWG2016-ip Kalaallit Nunaannut pingaarutaanik Christiansborgimi aamma saqqummiussisimavoq.

Kalaallit Nunaanni Timersoqatigiit Kattuffiat AWG2016-imut aamma isumalluarpoq.

Powered by Labrador CMS