AWG-mit assit: Kalaallit Nunaata Hodgson Trophee pissarsiaraa

2016-imi Arctic Winter Games-imik Nuuk ingerlatsisuussaaq

Nersornaat Hodgson Trophee kalaallit angalaqatigiit pisortaannut Lauritz Heilmannimut tunniunneqaroq Noah MølgaardKommuneqarfik Sermersuup borgmesteriata Asii Chemnitz Narupip, Inuit Ataqatigiit, Arctic Winter Gamesimik aaqqissuussisutut erfalasoq tiguvaa Noah Mølgaard

Arctic Winter Games-ip, Alaskami Fairbanksimi ingerlanneqartup naggataarnersiorneqarnerani Kalaallit Nunaata nersornaatit annersaat Hodgson Trophee pissarsiaraa. Kalaallit Nunaata nersornaat pissarsiaraa Arctic Winter Gamesimi, arfininngormat unnukkut naammassisumi, timersornermi pissuserissaarnerpaatut.
Kalaalit Nunaat Arctic Winter Gamesimi aatsaat taama angusarissaartigaaq, kalaallit timersortartut katillugit 60-inik medalje-nammata. Ukiut marluk matuma siornatigut Arctic Winter Gamesimi pissarsianit qulinik amerlanerupput.

Nuuk ingerlatsisuussaaq
Medalje-tigut kusanartumik angusat timersorluarnikkut anguneqarput. Hodgson Trophee-mik pissarsisussat peqataasut taasitinneqarnerisigut toqqarneqartarput.
– Hodgson Trophee-mik tunineqarnermut tupaallaatigeqaara tulluusimaarutigeqalugulu. Tassuuna takutinneqarpoq timersortartuvut Arctic Winter Gamesip nalaani timersortartutut ileqqorissaarnerat, Fairbanksimi Arctic Winter Gamesimi kalaallit angalasut pisortaat Lauritz Heilmann Sermitsiaq.AG-mut oqarpoq.
Kalaallit Nunaata Hodgson Trophee pingajussaa pissarsiaraa. Siullermik 1994-imi Albertami Slave Lake-mi, aappassaanillu 2002-mi Nuummi pissarsiarinikuullugu.
Arctic Winter Gamesip erfalasua maanna Fairbanksimi singinneqarpoq. Taannalu Arctic Winter Games internationale komite-ani siulittaasup tullianit Wendell Shiffler-imit Kommuneqarfik Sermersuup borgmesterianut Asii Chemnitz Narupimut, Inuit Ataqatigiit, tunniunneqarpoq.

Powered by Labrador CMS