Arctic Winter Games
AWG 2016-mi siuttussat aajuku
Nuummi Arctic Winter Gameseqarnissaanut piareersarneq aallarteruttorpoq. Allattoqarfimmi sulisut maanna inissipput
Arctic Winter Gamesimi aaqqissuisut erfalasuat Nunatta tigussavaa qaammatit marluk qaangiuppata Arctic Winter Games Alaskami naggataarnersiorneqarpat. Maanna Arctic Winter Games 2016-mi qullersaasup Maliina Abelsenip suleqatissani toqqartoreersimalerpai aaqqissuussinissarsuarmi ukiut marluk qaangiuppata pisussami ataqatigiissaarisussat.
Arctic Winter Games 2016 Nuummi pisussaq Nunatsinni pisut anginersarissavaat timersortartut 1.700-ut nunanit issittuneersut katersuutissammata. Nuummi aaqqissuisut nammineq piumassutsimik ikiuuttut 1.500-ut pisariaqartissavaat sapaatip akunnerata ingerlanerani unamminerit kulturikkullu aaqqissuussat iluatsittumik ingerlanissaannut qulakkeerisussat.
Martin Møller
Arctic Winter Gamesip qullersaa general manager Maliina Abelsen AWG 2016-ip allattoqarfiani suleqatissaminik toqqartuereersimalerpoq.
- AWG 2016-ip allattoqarfiani sulisut aalajangersimasut ilisaritissinnaanngorakkit nuannaarutigaara, aammalu AWG 2016 iluatsilluassappat inuiaqatigiinni kikkulluunniit attuumassuteqartut tamaasa suleqatiginissaat qilanaaraarput, general manager Maliina Abelsen oqarpoq.
Arctic Winter Gamesip allattoqarfiani sulisut tassaalerput:
Aviâja Lyberth Lennert, decembarip aallaqqaataani 2013-imi Director of Sponsorship and Project Management (aningaasaleeqataasunut suliniutinullu aqutsisutut) atorfinitsinneqarpoq. Aviâjap namminersorlutik suliffiutillit suliniummi peqataanissaat qulakkiissavaa, aammalu suliniutit ukioq manna aallartinneqartut ilarpassuisa nammassineqarnissaat qulakkiissaallugu.
Arnakkuluk Jo Kleist, januaarip aallaqqaataani Assistant to General Manager (qullersamut ikiortitut) atorfinitsinneqarpoq, tassuma attaveqaqatigiinneq, namminneq kajumissutsiminnik suleqataarusuttut allaffissornerlu akisussaaffigissavai.
Claus Nielsen, 2002-mi Nuummi AWG-qarnerani Director of Sports (timersuutinut aqutsisutut) atorfeqarsimasoq, atorfimmut tassunga januaarip aallaqqaataani atorfinitsinneqarpoq, tamatumuunalu timersuutit 15-it naammassineqarnissaat qulakkiissavaa, 2002-mi quliusimasunut sanilliullugu.
Arina Kleist, februaarip aallaqqaataani projektassistentitut (suliniummi ikiortitut) atorfinissaaq, suliniutillu aallartinneqarsimasut naammassineqarnissaannut ikiortaassalluni.
Martin Møller marsip aallaqqaataani Director of Logistics (aaqqissuussinermut aqutsisutut) atorfinissaaq. Martinip AWG 2016-imut atatillugu aaqqissuussinermut tunngasut annertoorujussuit isumagissavai.