Arctic Winter Games 2016
AWG 2016: Ataatsimiisitaliani sulineq aallartilersoq
Arctic Winter Games 2016-ip pilersaarusiorneranut tallimanngorneq immikkut malunnaateqartussanngorpoq, suliassammi ullormi tassani sineriammut siammarterneqassammata
AWG2016-ip ataani ataatsimiititaliat 57-it pilersinneqalersut, tamarmik immikkut suliamik akisussaaffiligaassussat, siullermeerlutik tallimanngornermi arfininngornermilu isumasioqatigiisinneqartussanngorput ataatsimiisitaliami sulineri aallarnisarlugit.
- Suliniummik ingerlatsineq tassa iluamik AWG2016-ip allattoqarfianit anillagulluni aamma ingerlasinnaanngorpoq. Suliniutip iluatsilluarnissaanut assorsuaq aamma pingaaruteqarpoq inuppassuit aalajangersimasunik sammisallit akisussaaffinnik tiguserusullutik nalunaarsimammata.
AWG2016-ip allattoqarfia tusagassiuutinut taama nalunaaruteqarpoq.
AWG2016-ip allattoqarfiata aamma ilisimatitsissutigaa tallimanngornermi arfininngornermilu isumasioqatigiinnermi qanorpiaq ataatsimiititalianut siulittaasuuneq paasisariaqarnersoq sammineqarnerussasoq.
- Tassa maanna AWG2016-imut qaaqqusisuusutut inissisimanerup inuiaqatigiinnut siammarterunneqarnera siulleq aallartilerpoq. Piffissap ingerlanerani amerlanerujartuinnartut akuutinneqalissapput, taavalu 2016-imi Kalaallit Nunaat peqatigiissoq nunatsinni aaqqissuussinerit taama ittut anginersaanni qaaqqusisutut inissisimalluni ingerlatsissaaq.