Issittumi Timersorneq
AWG 2016 2002-mit marloriaammik anginerussaaq
Arctic Winter Games ullut 400-rpiaat qaangiuppata Nuummi ingerlanneqalerpat kingullermik kalaallit AWG-mik aaqqissuussinerannit peqataasut marloriaammik amerlanerusut peqataassapput
Aappaagu Arctic Winter Games-imik aaqqissuussisut 2015-imi ulapissapput, taamatut siulittuivoq Arctic Winter Games-ip aappaagumit General manager-ia Maliina Abelsen. 2002-mi Nuup aaqqissuussisuuneranut sanilliullugu AWG-mi peqataasussat amerlassusaat marloriaatinngorsimassapput, taanna nassuiaavoq.
– 2016-imi timersortartut siullermik aaqqissuussinitsinnit marloriaammik amerlanerusut tikissapput, AWG-lu soorunami 2002-miilli ineriartorsimavoq, minnerunngitsumik piumasaqaatit naammassineqartussat amerleriarsimapput. 2002-mi peqataasut 800-t missaanniipput, 2016-imilu peqataasut 1850-t missaanniittut tikissapput, tamatumalu saniatigut VIP-t tusagassiortullu, Maliina Abelsen oqarpoq.
Aaqqissuussisut tatineqartut
AWG 2016-imi peqataasussat taama amerlatigimmata aaqqissuussisut soorunami immikkut tatineqarput, 2015-imilu ulapissapput.
– 2015 ukioq suliffiulluassaaq, pingaartumik pilersuineq eqqarsaatigalugu. Unnuinernut, nerisitsinernut, assartuinermut il.il. aqutassarpassuaqarpugut. Suliassat ilisimanngikkaanni annertussusaat takorlooruminaassinnaavoq. Tassaapput annertuumik pilersaarusiornermit immikkoortunut mikinerpaanut pilersaarusiornerit, General manager Maliina Abelsen nassuiaavoq.
Soorlu arfermik nerilluni
Maliina Abelsen naapertorlugu unammilligassat annersarisimavaat aaqqissuussinerup tamavimmi ineriartortinnissaat, qulakkeerlugulu kikkut tatmarmik suliassatik eqqortut suliarissagaat. Taamaattumik aaqqissuussaalluartumik suliariaqarpoq, taanna nassuiaavoq.
– Allaanngilarmi arfermik nerilluni - sukkut aallartissaagut? Sukkut pilallugu aallartinneqartarpa? Aatsaat miknerujussuanngorpata paasiuminarsiartulissaaq, Maliina Abelsen oqarpoq.
Misilittakkat atorsinnaasut
Aappaagu AWG-qarnissaq 2002-mi AWG-mut, aamma Nuummi ingerlanneqartumut, sanilliukkuminaassinnaagaluartoq qulajartumik taamanikkornit misilittagaqarpoq atoqqinneqarsinnaasunik.
– Inoqarpoq 2002-mi peqataasimasunik misilittakkanik pinngitsoorneqarsinnaanngitsunik pigisalinnik, tamakkualu ilarpassui 2016-imi peqataaqqissapput, tamannalu nuannaarutigeqaarput, Maliina Abelsen oqarpoq.
Aningaasaqarnera suli inissinngilaq
AWG-p aningaasaqarnera Aningaasaqarnermut Naalakkersuisuusimasup Maliina Abelsenip pissusissamisoorluinnartumik sammisorujussuuvaa.
– Piffik atorparput aningaasaliissutigineqartunik sippuiffiusinnaanngitsoq, aningaasaqarnermillu aqutsiffiusussaq. Suliniut aallartissimavoq 9 millioner koruunit missaannik ingerlatsinermi amigartooruteqarluni, taakkuli 6 millioner koruunit missaannut appartinneqareersimapput. Taamaattumik aap, aningaasaqarnera tamarmi suli inissivissimanngilaq, neriuppugulli tamanna 2015-imi aasaq nallertinnagu inississimassallutigu.
Aningaasaliisunut atatillugu aningaasat kisimik pineqanngillat, taanna itisilerivoq.
– Imaanngilaq ingerlatsiviit "aningaasaannarnik" tunniussisinnaasut, aammattaarli assersuutigalugu ikiuinermik suilsunillu atugassaqartitsisinnaapput. Ingerlatsiviit immikkut ilisimasaqarfimminnut neqerooruteqassallutik pitsaalluinnartuusimapput, Arctic Winter Games 2016-ip General manageria Maliina Abelsen naggasiivoq1.
AWG-mut tunuliaqutaavoq Host City, tassanilu inuttaapput siulittaasoq, Kommuneqarfik Sermersuup borgmesteria Asii Chemnitz Narup, Naalakkersuisunut ilaasortaq Nivi Olsen kiisalu Kalaallit Nunaanni Sulisitsisut Peqatigiiffianni pisortaq Brian Buus Pedersen.