Qaasuitsoq

Avinnermi akiligassaq paatsuungassutaasoq

IA-miit Peter Olsenip Kim Kielsen marlunnik oqaqarluni oqalunnerarpaa

Qaasuitsup Kommuniani illoqarfinniit annersaannit assi

Inatsisartut ukiaanerani ataatsimiinnerminni ullumi aallartittumi Qaasuitsup Kommuniata kommuninut marlunnut mikinernut avinnissaanut inatsisissatut siunnersuut oqaluuserissavaat, inatsisissatullu siunnersuutip saqqummiunneqarnissaa sioqqullugu kommunit avinneranni aningaasatigut atugassat nalornissutaalereerput.

Atuaruk: Kommunip avinneqarnissaa akisussaqaaq

Millioninik akeqassasoq
Siunnersuisartut kukkunersiuisartullu BDO-p nalunaarutaa tunngavigalugu Naalakkersuisut nalilerpaat 2017-imi kommunit nutaat pilersinneqaranni ataasiartumik aningaasartuutit minnerpaamik 15,8 million koruuniussasut kommunillu marluk ingerlannerannut ukiumut aningaasartuutaanerusartussat minnerpaamik 9,4 million koruuniusassasut.

Atuaruk: Qaasuitsup Kommunia 1. januar 2018-imi avinneqassaaq

Akiligassarli kiap akilissavaa?

Aaqqiisoqarnissaanut ammasut
Naalakkersuisut siulittaasua Kim Kielsen kommunit avinnissaanni aningaasartuutit aningaasalersornissaannut Inuit Ataqatigiinniit Peter Olsenip § 37 naapertorlugu apeqqutaanut akissummini allappoq:

– Naalakkersuisut siusinnerusukkut oqaatigaat kommunit naatsorsuutigissanngikkaat inuiaqatigiit sinneri kommunit avinneranni aningaasartuuteqassasut, Naalakkersuisulli naapertuuttumik aaqqiisoqarnissaa ammaffigaat kommuni qanimut oqaloqatigalugu. Suliassaavorlu Inatsisartut aalajangeeqataaffigisassaat.

Tassalu aningaasartuutit avinnissaat pillugu ammasoqarpoq Inatsisartunilli aalajangerneqartussaalluni.

Inatsisissatut siunnersuummi tusarniaassutigineqaqqammersumi oqaaseqaatini allassimavoq:

Nammineq akiliissasut
– Siunnersuutigineqassaaq Qaasuitsup Kommuniata avinneranut aningaasartuutit Qaasuitsup Kommunianit namminermit akilerneqassasut. Siunertaavoq kommunit avinneranni aningaasartuutit nunatta karsianut sunniuteqassanngitsut imaluunniit kommuninut pingasunut allanut. Tamatumani tunngavigineqarpoq Qaasuitsup Kommuniata avinnissaa kommunip nammineq kissaatigimmagu.

Tassalu avinnermut nunatta karsiata akuutinneqarnissaa itigartivinneqarluni.

Marlunnik oqaqarluni oqaluttoq
Peter Olsenip Kim Kielsenip akissutaa naammaginngilluinnarpaa.

– Siunertarigaluarpara Kim Kielsen ersarissumik naggataarutaasumillu akissuteqassasoq kommunit avinneranut atatillugu kikkut aningaasartuutit akilissaneraat pillugu, kikkullu akiliissanersut pillugu oqaaseqarusunngilaq, Peter Olsen Sermitsiamut oqarpoq.

Allaaserisaq tamaat Sermitsiami atuaruk

Powered by Labrador CMS