Aviisit marluk tapiissutinik kukkunermit eqqugaasinnaapput

- Suliffeqarfimmut aammalu Nunarput ataatsimut isigalugu aningaasaqarnerup qajannartumik isikkoqarnera pissutigalugu, tusagassiorfimmi siulersuisut piffissami aggersumi kingunissat misissorpaat, tassanilu Kujataani aamma Avannaani aviisit marluk, tassa Tamanut Avannaani aamma Tamanut Kujataani matusinnaanissaat.

Tusagassiorfimmi Sermitsiaq.AG-mi pisortaq, Poul Krarup, suliffeqarfiup siulersuisa ataatsimiinneranut atatillugu ullumi tusagassiorfinnut nalunaarummi taama allappoq.

Aningaasarpassuit annaaneqarput
Tusagassiorfinnut tapiissutit millionit koruunit arlaqartut suliffeqarfimmit maanna aviisinik marlunnik nuna tamakkerlugu saqqummertartunik, lokal aviisinik pingasunik, aammalu atuagassianik arlalinnik, kiisalu nittartakkakkut tusagassiorfik maanna atuakkat, Sermitisaq.AG, arsaarinnissutigineqarnerat qularnaateqanngilaq.

Inatsisartuni ataatsimiititaliaq eqqumiitsumik oqariartuutigisami illuatungianik aammalu aningaasanut inatsisip maanna atuuttup eqquutsinnagu iliuuseqartoq, pisortaq isumaqarpoq.

Aamma atuaruk: Sulisitsisut aviisit piujunnaarnissaat ernummatigaat

- Kukkunersiuinermut Ataatsimiititaliap nunatta karsianut 2014-mut naatsoorsuutinut isumaliuutissiissutertik, Naalakkersuisut nuna tamakkerlugu aviisinut ingerlatsinermut tapiissutinik suliaqarnerat ajorluinnarneranik inerniliisoq saqqummiteqqammerpaa.

Ataatsimiititaliap isumaliutissiissutaa 'naammaginanngilluinnartumik' suliamik ingerlatsisoqarneranik oqaasertaqarpoq.

- Sakkortunerusumik oqaatigineqarsinnaanngikkunarpoq, Poul Krarup, Sermitsiami aamma aaqqissuisuusoq erseqqissaavoq.

Isit siutillu matugaat
- Taamaakkaluartoq taanna ataatsimiititaliaq tallimanik inuttaqartoq isumaqanngilaq, tamanna Naalakkersiusunut aamma atorfilittanut kinguneqartitsisoqartariaqartoq, suliamik ingerlatsineq annertuumik isornartillugu.

- Taamalu Inatsisartut aalajangerput, taamaalillunilu kikkut tamarmik aningaasanut inatsimmut aalajangiineq qularnaatsutut isigisariaqarunnaarpaat.

Taassuma ugguaraa, nunatta politikeriisa inuiaqatigiinni inatsisilersuillutillu namminneq malittarisassanik unioqqutitsiinnartarnerat.

- Sermitsiaq.AG-mi siulersuisut akuersaarsinnaanagulu paasiuminaatsippaat, ataatsimiititaliap isumaliuutersuutip oqariartuutigisaa malinngimmagu, illuatungaanillu eqqartuussiveqarfinnut ombudsmandimullu innersuussiinnarnerat.

Piffissaq kingulleq atorlugu millionit affaat
2016-mut aningaasanut inatsisissap pingajussaaneerneqalernera sioqqutilaarlugu Naalakkersuisut millionit affaannik ingerlatsinermut tapiissuteqarniarlutik neqeroorput, kisianni tusagassiorfiup siulersuisuisa tamanna iperaannarpaat.

- Tamanna naleqqutinngilaq, tamassumalu tusagassiorfiup 2014-mi iliuuseqarfigineqarnerata taarsersinnaanngilluinnarpaa. Aamma ilikkarneqareerpoq, tapiissutip naggataagut tunniunneqarnissaa qularnaarneqarsinnaanngitsoq.

Tusagassiorfimmi Sermitsiaq.AG-mi siulersuisut ujartorpaat, tusagassiuutinut politikki siulleq Inatsisartunit amerlanerussuteqartunit akuerineqarsimasoq, aammalu tusagassiuutinut politikkissap Naalakkersuisunit atorfilittanillu toqqaannartumi aqunneqarpallaarnissaa qunugalugu, demokratiilu tassuunakkut eqqorlugu.

Aamma atuakkit:

Aviisinut tapiissutinut tunngatillugu Inatsisartut salloqittarneqartut

Tusagassiorfinnut tapiissut nutaaq inissittoq