tusagassiuutit
Aviisi: Unioqqutitsilluni kunngikkormiunik nakkutiginnittoqarsimavoq
Aviisi ullormut saqqummersartoq Se og Hør tusaamasanik unioqqutitsillutik nakkutiginnissimasut BT allappoq
Se og Hør ukiuni sisamani IT-mik ilisimasalimmik sulisitsisarsimasoq, kiisalu kunngikkormiut inuillu tusaamasat aningaasanik atuineranik malinnaasarsimasoq atuakkami marlunngorpat saqqummertussami ilaatigut allanneqarpoq.
Nakkutiginninneq 2008-mit 2012-imut ingerlasimasoq BT-imit allaaserineqarpoq.
Se og Hør-imi tusagassiortuusimasoq Ken B. Rasmussen, atuakkiamini 'Livet, det forbandede'-mi ilaatigut taama allappoq. Atuagaq marlunngorpat saqqummissaaq. Oqaluttuami Set og Hørt pineqarpoq, BT-ili allappoq pisut uppernarsarneqarsinnaasut.
Atuakkami Ken B. Rasmussen ilaatigut allappoq, pisortap akuersissutaanik IT-imik ilisimasalimmik sulisoqartoq, tusaamasat aningaasanik qanoq atugaqarnersut takuneqarsinnaanngorlutik.
Kunngikkormiu Joachim nulialu Marie maajip 24-ani katimmata isertuunneqartumik Canadamut angalapput, aningaasanillu atuineranni takuneqarsinnaalluni sumi angalanersut, taamaattumik Se og Hør assinik saqqummersitsisinnaasimalluni.
- Malinnaaffigerujuuginnavippagut. Tamanna eqqumiippoq. Jokke neriniartarfiit ilaanni akileereersimagaangat sekundi ataaseq qaangiuttorlu mobilinnut nassiunneqartarpoq.
- Vancouverimiimmata tammaaqattaaraluarpagut, akiliinerisali paasitittarpaat sumiinnersut, atuakkami ilaatigut ilanngunneqarpoq.
IT-mik ilisimasallip akiliinerit iserfigisinnaasimavai.
Suleqatigineqartoq akileraarutitaqanngitsumik akissarsitinneqartarsimavortaaq, qaammammut 10.000 koruuninnattarluni.
BT-imit allaaserineqartut ilumut eqqortuunersut suli uppernarsineqanngilaq. Tusaamasat soorlu Line Baun Danielsen aamma Casper Christensen assinganik malinnaavigineqarsimapput.
Se og Hør-imi pisortap oqaatigineqartut eqqortuunnginnerarpai.
Pisortaq Niels Pinborgi toqqaannartumik aperineqarpoq inatsisit iluini sulisoqarsimanersoq.
- Aap, akissutigaa.