Naalakkersuisooqatigiilersut
Aviisi Information: Naalakkersuisut milliardilikkaanik nalilinnut neriorsuipput
Qallunaat aviisiat ullormut saqqummersartoq sisamanngornermi allappoq Naalakkersuisut neriorsuutaat isertitassatut naatsorsuutigineqartunit amerlanerusut
Naalakkersuisooqatigiilersut Siumut, Demokraatit aamma Atassut naalakkersuisooqatigiilernissamut decembarip sisamaani isumaqatigiissuteqarput.
Qaqortup Narsallu akornanni mittarfimmik, Tasiilami mittarfimmik kiisalu Ilulissat mittarfiata tallinissaanut sanaartugassatut naalakkersuisooqatigiinnissamut isumaqatigiissutigineqartut ilagaat.
Aviisi ullormut saqqummersartoq Information sisamanngornermi allappoq Naalakkersuisut neriorsuutaat akisuut isertitassatut naatsorsuutigineqartunit amerlanerusut.
Aviisi Information nangilluni allappoq naalakkersuisooqatigiinniarlutik partiit isumaqatigiissuteqartut minnerpaamik tigusussaasunik 25-nik neriorsuuteqartut.
Neriorsuutit, aviisi Information najoqqutaralugu annerusumik minnerusumilluunniit nunatta karsianut imaarukkaluttuinnartumut ajorseriartitsiinnartussatut nalilerneqarput.
Nunatta karsia ukioq manna 275 million koruuninik amigartoorfiusussatut ilimagineqarpoq, naak missingersuutini 21 million koruuninik sinneqartoortussatut missingersuusiorneqarnikuungaluartoq.
Atuaruk:Amigartoorujussuarneq: Aningaasaqarneq taamaammat taama inissisimavoq