Aviâja Helms Sinniisoqarfimmi pisortatut tunuarpoq

Eqqarsarluareernerup kingorna eqqartuussissuserisoq Aviâja Helms, Københavnimi Kalaallit Nunaata Sinniisoqarfiani sinniisoqarfimmi pisortanngornissamik neqeroorfigineqarnini akueriniarnagu aalajangerpoq.

Naalakkersuisoqarfimmi pisortaq Svend Hardenberg aalajangernermut atatillugu tusagassiutinut nalunaaruteqarpoq.

- Ajuusaarutigisorujussuullugu ippassaq pingasunngorneq ulloq 27. august nal. 17:12 maili Aviâja Helms-imiit, Københavnimi Sinniisoqarfimmi atorfimmi sulilernissaminik kissaateqarani nalunaarut tiguara. Eqqarsarluareerluni ilaquttanilu oqaloqatigereerlugit taamatut aalajangersimavoq.

- Atorfinitsitsinissamut ataatsimiititaliamiit paasissutissanik isertuussanik kalerriutiginnittoqarsimanera ajornartorsiutitaqartorujussuusoq isumaqarpoq, taamaalillunilu tamanut ammasumik saqqummiunneqarluni oqallisigisassanngortinneqarnini. Tamannalu aalajangerneranut pisooqataalluinnarpoq, Svend Hardenberg allappoq.

- Atorfinitsitsinissamut ataatsimiititaliami siulittaasutut aalajangernera ajuusaarutigisorujussuuara, tassami atorfimmik isumaginninnissamut tamakkiisumik piginnaaneqarmat. Aalajangiineq tusaatissatut tiguneqarpoq, aammalu maannakkut Københavnimi atorfiup inuttalerneqarnissaanut suliap ingerlaqqinnissaa nalilersortussanngorparput.

Tunuartitsinissamut kaammattorneqartoq
Kalaallit Nunaata Sinniisoqarfiani atorfeqassagaanni ilaatigut piumasaqaatigineqarpoq 'ukiuni pingasunit tallimat tikillugit atorfimmi pisortatut misilittagaqareersimanissaq imaluunniit politikkikkut aalajangiisuusumik ukiuni tallimani aalajangeeqataasarsimanermut misilittagaqarsimanissaq'.

Kommuneqarfik Sermersuumi pisortaaneq Steffen Ulrich Heinrich ilaatigut ima allappoq.

'Asasara Aviâja Helms. Atorfimmut tulluuttuunnginnerit pissutigalugu qinnuteqaatit utertissinnaaviuk? Atorfik Kalaallit Nunaannut pingaaruteqartorujussuuvoq. Taamaattumik Københavnimi Sinniisoqarfimmi tulluartumik pisortaqartariaqarpoq. Aqutsinermik misilittagaqareersumik atorfimmi pisortaqartoqartariaqarpoq. Qinnuteqartormi aqutsinissamik misilittagaqanngilaq.'

Kuupik Kleist qinnuteqartunut ilaasoq
Atorfimmut qinnuteqartuni 21-iusuni qinnuteqartut ilagaat Naalakkersuisut siulittaasorisimasaat Kuupik Kleist, Inuit Ataqatigiit.

Tusagassiutinut nalunaarummi ilaatigut ima allappoq.

- Nalugaluarpara aalajangiiniarnermi periutsit qanoq ittut atorneqarsimanersut, kisianni uanga atorfinitsinneqannginnera pillugu naammagittaalliuteqanngilanga aamma qinnuteqarsimasut akornanni toqqaaneq soorunami ataqqivara, Kuupik Kleist oqarpoq.

Kuupik Kleist tassunga tunngatillugu annertunerusumik oqaaseqarusunngilaq.