pilluarit

Aviaaja - ernisussiortoq nutaaq nuannersumik oqaluttuassartalik

Aviaaja Kuuna Birkholm Nuummeersoq ernisussiortutut ilinniarnini naammasseqqammerpaa - ataasinngormallu Københavnimi allagartartaarpoq

Aviaaja
Ernisussiortoq Aviaaja Kuuna Birkholm allagartartaartoq

Aviaaja Kuuna Birkholm Nuumminngaanneersoq ernisussiortutut soraarummeersimanermut uppernarsaatini ataasinngormat Københavnimi ernisussiornermut ilinniarfimmi tiguaa. Taanna uinilu meeqqatillu pingasut Københavnimi maanna najugaqarput, 31-nik ukioqarpoq siornatiugullu Niuernermik Ilinniarfimmi Nuummi allaffimmiutut ilinniarsimasuuvoq, Kalaallit Nunaanni Eqqartuussivinni, AG-mi aamma Mælkebøttenimi atorfeqarnikuulluni.

Ilinniarnertuunngorniassalluni 2009-mi aalajangerpoq - ilinniagaqalernissamut piareersarnermut pikkorissarnermut GUX Nuummi ilinniarfiusup ukiup ataatsip affaa ingerlappaa, ilinniarnerullu naggataa Danmarkimi Hillerød HF VUC-mi ingerlatereerlugu ilinniarnertuunngorpoq.

Ilinniarnertuunngorniarnermi naggataani aappaariit ernerat, Silas Danmarkimi inunngorpoq, kisiannili ullut quliinnaat atuanngiffeqariarluni ilinniakkani naammassiniarniarlugu aalajangerpoq. Taassuma uia ernereernerup kingorna sulinngiffeqarpoq, inoorlaajutertillu Hillerødimi ilinniarfiup eqqaani paaralugu, tassami Aviaaja Kuuna Birkholm atuarnermini unitsiarnerni milutsitsisinnaaniassammat. Iluatsitsivorlu ilinniakkamini angusillulaqaluni.

Najukkaminni ernivoq
Aviaaja ernisussiornermik ilinniarfimmut Københavnimi qinnuteqarpoq ilinnialernissamullu akuerisaalluni. 2011-mi ilinniarnini aallartippaa, taanna ilinniagaq Danmarkimi ilinniakkanut akueritinnissamik ajornarnerpaat qulit ilagaat. Ilinniarnermi nalaani aappariit paniat Vioila inunngorpoq, ukioq ataaserlu ilinniarnini ernereernerup kingorna unitsikkallarpaa. Aviaajap aalajangiussimavaa najukkaminni Vesterbromi Københavnimi erniniarluni.

Ataasinngormat ernissuissiortutut ilinniartoqatinilu Københavnimi allagartartaarput, naggataarutaasumik misilitsinnermi 10 karaktereralugu. Suliffimmik misiliinermini kingullermi Københavnimi Hvidovremi napparsimmavimmi atorfininnissamik neqeroorfigitippoq, atorfininnissamullu isumaqatigiissummik ilinniarnermi naammassinissaa qaammatialunnik sioqqullugu atsiorpoq.

Powered by Labrador CMS