Aatsitassanut inatsit
Avataq: Ingerlaffik ulorianartoq
Aleqa Hammondip inatsisissatut siunnersuutaa nalliuttorsiornerni ammanerulernissamik oqaluttarnernut toqqaannartumik akerliuvoq, kalaallit avatangiisinut illersuiniaqatigiiffiat isumaqarpoq
– Ingerlatsineq matoqqanerulissaaq, tamatumani innuttaasut kattuffiillu soqutigisaqaqatigiiffiit nakkutigiuminaatsinnerulissavaat aatsitassanut oqartussaasut selskabersuillu nunanit tamalaaneersut sunik isumaqatigiissuteqarnersut.
Taamatut kinguneqarnissaanik siulittuivoq avatangiisinut peqatigiiffiup Avatap siulittaasua Mikkel Myrup, Naalakkersisut siulittaasuata Aleqa Hammondip, Siumut, inatsimmut allannguutissatut siunnersuutaa akuersissutigineqassappat.
Siunnersuutikkut piffissaq, innuttaasut aatsitassanik suliniutinut takunnissinnaanermut qinnuteqarsinnaaffiat kinguartinneqarsinnaavoq.
Inatsisissatut siunnersuummut oqaaseqaatini takunnissinnaanermut immikkut malittarisassiariniarneqartoq tunngavilerneqarpoq takunnissinnaanermut qinnuteqaatinut akissuteqarnissaminnut atorfillit piffissarujussuaq nukippassuillu atortarmatigit. Piffissaq ilaatigut atorneqartussaq pappialarpassuit teknikkikkut paasiuminaatsunik imallit, uuliasioqatigiiffiit aatsitassarsiorfiillu nassiussaasa akineqarnissaannut, assersuutigalugu akuerineqarnissamik, akuersissutinik qinnuteqaateqarneranni, imaluunniit missingersuummut apeqqutaannut. Tamatuma saniatigut tusarniaanermut atatillugu pappialat aatsitassarsiornermut tunngasorpassuit tamanut saqqummiunneqartarput.
´Pappialat tiguneqartut eqaatsumik sukkasuumillu suliarineqarnissaat eqqarsaatigalugu siunnersuutigineqarpoq piffissaq takunnissinnaanermut qinnuteqarfissaq kinguartinneqassasoq aalajangiisoqareernissaanut imaluunniit suliassap unitsinneqareerneranut. Taamaasilluni piffissaq ilaatigut atorneqarsinnaalluni pappiaqqat tusarniaanissamut piareersarnerannut, suliassat takunnissinnaanermut qinnuteqaatit, pappialat kingorna saqqummiunneqarfissaanni, isummerfiginagit´oqaaeqaatini allassimavoq.
Tunngavilersuut tamanna Avatap siulittaasuata upperinngilaa.
– Ingerlaffik ulorianartuuvoq, nalliuttorsiornermi politikerit ammanerulernissamik oqaluttarnerannut toqqaannartumik akerliusoq. Akerlianik pineqarpoq ingerlatsinerup matoqqanerulernissaa oqartussaaqataannginnerulernissaalu. Politikerit siuttut namminnerluunniit tamanna ilisimagunanngilaaq, tassami oqaluuseriuaannarpaat ammanerulernissaq sulissutiginiarlugu.
Sermitsiami inatsisissatut siunnersuut pillugu annertunerumik qisuariaaterpassuillu atuarsinnaavatit.