Avatangiisinut tapiissutit
Avatangiisinut pitsannguinermut tapiissutit millionit
Naalakkersuisuni ilaasortaq Atassummiit Mala Høy Kúko, kommunit avatangiisinut teknologiimut atortunik sananissamut pitsannguinissamullu 14,4 millionit koruuninik tapiissuteqarpoq
Aningaasanut inatsimmut 2015-imut ilagitillugu Naalakkersuisut avatangiisinik pitsannguinissamut atortunut 14,4 millionit koruuninik immikkoortitsipput. Taakkunanngalu 10 millonit koruunit kommunini avatangiisinut atortunik pitsannguinissamut tapiissutitut tunniunneqartussanngorput.
Pinngortitamut avatangiisinullu naalakkersuisoqarfik ilisimatitsivoq.
Aningaasat ilaatigut illoqarfinni annerni arfinilinni ikuallaaveqarfinnik teknikkikkut misissuinissamut atorneqassapput. Teknikkikkut misissuinerit pigineqalerpata, kommunit siunissami ungasissumi pitsaanerusumik aserfallatsaaliuinissaq aammalu ikuallaaveqarfinni pisariaqartinneqartunik pitsannguinissaq, taamaalillunilu ikuallaaveqarfiit mingutsitsinnginnerulernissaat qulakkeersinnaalissavaat.
Aniatitsineq annertuallaartoq
Pinngortitamut avatangiisinullu naalakkersuisoqarfik ilisimatitsivoq, ullumikkut sumiiffinni amerlasuuni ikuallaaveqarfinnit dioxin (toqunartut klorimik akullit, red.) aniasoq qaffasipallaarujussuarpoq, tamannalu peqqissutsimut avatangiisinullu annertuunik sunniuteqarpoq. Taamaattumik ikuallaaveqarfinniit putsup aniasup pitsaanerusumik naleqqunnerusumillu suliarineqarsinnaanissaa anguniarlugu sulinissaq pingaaruteqarpoq.
Qaanaami Qasigiannguanilu eqqakkanik ulorianaatilinnik tigooraaviliornissamut tapiissuteqartoqarpoq.
- Illoqarfiit tamarmik tigooraavilersorneqarnissaat qangaaniilli pingaarnertut anguniagaavoq, taamaattumillu illoqarfiit kingulliit ilaalermata naammagisimaarnarpoq – taamaalillutalu anguniagaarput angussavarput. Naalakkersuisuni kommunit eqqagassalerinermi ikiorsersinnaagatsigit nuannaarutigaarput, aammalu suliniutit assigiinngitsut, maanna aallartinneqartussat malinnaaffiginissaat qilanaaraarput, Mala Høy Kúko oqarpoq.
Taassuma ilanngullugu erseqqissarpaa, kommunit kommunini atortunut aningaasalersuinissamut peqataanissaat piumasarineqarmat.
Suliassat tapiiffigineqartussat sinneri tassaapput Qaqortumi ikuallaavimmi aserorterissummik, Maniitsumi Sisimiunilu containerit asiutitsivinnik, Kommuneqarfik Sermersuumut eqqakkanik ikuallanneqarsinnaasunik ballenut naqitsissummik aamma Ilulissani Aasiannilu igalaaminernut saviminernullu katersuiveqarfimmik pisinissaq, Mala Høy Kúkop naalakkersuisoqarfia ilisimatitsivoq.