saliinissaq
Avatangiisinut akisussaasoq Dundasimi isumaqatigiissut pillugu: Pitsaanerusariaqarpoq
Dundas-imi avatangiisit ajoquserneqarnissaat pinngitsoortinniarlugu iliuusissat pillugit politikkikkut isumaqatigiissut 'pitsaanerusariaqartoq' pinngortitamut avatangiisinullu naalakkersuisoq oqarpoq
- Avatangiisit ajoquserneqarnissaat pinngitsoortinniarlugu iliuuseqarnissaq – iliuusissat avatangiisit sunnerneqarnissaannik pitsaaliuisussat – kisianni sumiiffimmit eqqagassat tamarmik peerluinnarneqarnissaannik ilaqanngitsoq, pillugu politikkikkut isumaqatigiissuteqartoqarsimasoq maluginiassallugu pingaaruteqarpoq.
Pinngortitamut,avatangiisinut inatsisinillu atuutsitsinermut naalakkersuisoq Mala Høy Kúko oqarpoq.
Dundasimi eqqakkat pillugit oqallinnermi taamatut oqaaseqaateqarpoq.
USA-p Pituffimmiinneranut atatillugu eqqagaapput, kisianni USA-mik isumaqateqareernermi kingorna Kalaallit Nunaannit Danmarkimiillu akisussaaffigineqarput.
Pinngortitamut, avatangiisinut inatsisinillu atuutsitsinermut naalakkersuisutut Mala Høy Kúko isumaqarpoq siunissami assigusunik saliinissani, saliinissamut suliassarpiaq akisussaaffigilerlugu politikkikkut isumaqatigiissuteqannginnissaq pingaaruteqartoq. Tamatumunnga taarsiullugu saliinerup tamakkerlugu naammassineqarnissaata tungaanut saliineq mingutsitsisut akisussaaffigisariaqaraluaraat, Atassut tunuliaqutaralugu politikkeri isumaqarpoq.
Assingusumik isumaqatigiissuteqartoqassanngilaq
- Ajoraluarpoq taamanikkut Naalakkersuiuusoq Anthon Fredriksen (Kattusseqatigiit Partiiat aaqq.) taamaattumik politikkikkut isumaqatigiissuteqarnissaq toqqarsimammagu, kisianni pisoq pereerpoq, aammalu siusinnerusukkut Naalakkersuisuusimasut avatangiisit, aningaasaqarneq aammalu suna suliaqarnermi ajornannginnersoq eqqarsaatigalugit inissiivimmik aaqqiissuteqarnissaq toqqarsimavaat.
- Siunissami Kalaallit Nunaata saliinermi suliassat akisussaaffillu akisussaaffigilerlugit politikkikkut isumaqatigiissuteqartoqartannginnissaa uanga Avatangiisinut Naalakkersuisutut sulissutiginiarpara, tuasagassiutinut nalunaarummi Mala Høy Kúko oqarpoq.
Eqqakkat
2013-imi Naalakkersuisuusut isumaqarput, nunameersunut mingutsinneqarsimasunut ataavartussamik inissiiveqarneq, politikkikkut isumaqatigiissummi siunertaasunut naapertuuttumik avatangiisitigut akuersaarneqarsinnaasumik aaqqiissutissaasoq.
- Politikkikkut isumaqatigissummi siunertaavoq, eqqakkat sinerissamiit aamma imaani avatangiisiniit peerneqarnissaat, aammalu inissiivissaq tamatumunnga naapertuuttumik sumiiffimmi imaani avatangiisit qimallugit, eqqakkanik allanik inissiivioreersumut, inissinneqarpoq, naalakkersuisoq ilisimatitsivoq.
Nunameersut mingutsinneqarsimasut nunap ataani itisuumi inissinneqarput, nuna qeriuaannartoq nunameersunit mingutsinneqarsimasunit taakkunannga qaffasinnerulersillugu.
- Taamaalilluni nunameersut mingutsinneqarsimasut ullumikkut nunap ataani 1,5 meterit missaani ataatsimoorlutik serminngorsimapput. Itisuumi inissisimaneranni nunameersut mingutsinneqarsimasut taakkua aamma aasap qaammataanni panertannginnissaat qulakkeerneqarpoq. Peqatigisaanik inissiinerup suliarineqarnerani nunamut naleqqussarneqarpoq aammalu sumiiffik tulluuttumik kusanartumillu qimanneqarluni, Mala Høy Kúko nassuiaavoq.