Wednesday, January 11, 2017 - 06:05

Avatangiisinik nalilersuinernik takunnissinnaatitaaneq GME-mit suli kinguarsarneqartoq

Narsap eqqaani aatsitassanik uranitalinnik piiaanerni avatangiisitigut kingunerisassat suussanersut takunissaat kinguarsarneqarpoq
Assi.: GME
Naak Kuannersuarni aatsitassat qaqutigoortut uranilu pillugit suliniut pillugu oqallinersuaqaraluartoq avatangiisinik nalilersuinermi inernerit suli tamanit atuarneqarsinnaalinngillat. Aamma qanittumi akuerineqarunnanngilagut

Narsap eqqaani Kuannersuarni aatsitassanik uranitalinnik piiaanerni avartangiisinut kingunerisassat pillugit ilisimasat innuttaasut suli takujunnaanngilaat.

Avatangiisinik nalilersuinermi VVM-imik taaneqartartussatut siunnersuut aatsitassanut Naalakkersuisoqarfiup aatsitassarsioqatigiiffiullu akornanni qaammaterpassuanngulersuni utertittaqattaarneqarpoq, uffa inaarutaasumik tunniussinissamut ulloq kinguartinneqaqattaartoq.

Aamma naak inatsit naapertorlugu nalinginnaasumik Namminersorlutik Oqartussanit allakkianik anisunik isertunillu takunnissinnaatitaasoqaraluartoq malittarisassat taakku aamma allaffissornikkut atorunnaarallarsinneqarsimarpasipput.

Qaammatit pingasut
Danmarkimi DR aamma kingusinnerusukkut AG aallarniutitut 2016-mi oktobarimi siunnersuummik takunnissinnaatitaasutut nalunaarfigineqarsimagaluarput. 

Kisianni taamatut aalajangerneq Greenland Minerals and Energy-mit (GME) naammagittaalliuutigineqarpoq, taamaalilluni suliassaq Naalakkersuisunut annguppoq suliarlu unitsinneqarallarluni.

Qaammatit marlussuit qaangiummata Aatsitassanut Avatangiisinullu Aqutsisoqarfiimmi suliassap suliareqqinneqartussanngornera inerniliunneqarpoq, tassani aallaqqaammut allakkiat tunniunneqarnissaat aalajangersimagaluarpoq, ilaatigut GME peqataatillugu. Tamanna kinguarsarneqartoq januaarip ulluisa aappaanni Aqutsisoqarfimmit AG-mut nalunaarutigineqarpoq.

- Ilisimaneqartutut suliassaq Greenland Minerals and Energy Ltd-imut VVM pillugu nassuiaatissatut siunnersuusiorsimasumut aamma ujaasinissamut piginnittussaatitaasumut, tusarniaassutiginerqartoq Aqutsisoqarfimmi pisortaq Najaaraq Demant-Poort AG-mut allappoq.

Allaaserineqartoq aviisimi AG-mi tamaat atuarneqarsinnaavoq. Aviisi pisiniarfinni pisiarineqarsinnaavoq, uanilu aamma pisiarineqarsinnaalluni:

Seneste nyheder / Nutaarsiassat kingulliit