qinersineq
Avatangiisinik illersuiniaqatigiiffit marloqiusamik qinerseqqusipput
Avatangiisinik illersuiniaqatigiiffiit Avataq, VedvarendeEnergi, Det Økologiske Råd aamma NOAH, Inatsisartunut qinersereernermi uranimut naaggaarluinnarnerup eqquteqqinneqarnissaa kaammattuutigaat
Avatangiisinik illersuiniaqatigiiffik, Avataq, Qallunaat Nunaanni avatangiisinik illersuiniaqatigiiffiit peqatigalugit kalaallinut qinersisartunut kaammattuuteqarpoq, uranimut naaggaarluinnarnerup 1986-miilli atuussimasup, Inatsisartut nutaat atuutilerpata eqquteqqinneqarnissaannut qulakkeerinneqqusilluni.
- Nunarsuup ilaani sumiiffinni allani uranimik piiaasarnerit takutippaat avatangiisinik annertuumik innarliinani piiaasoqarsinnaanngitsoq. Issittumilu piiaaniaraanni tamanna suli ajornerussaaq, Mikkel Myrup Avatameersoq, VedvarendeEnergi, Det Økologiske Råd aamma NOAH peqatigalugit tusagassiuutinut allappoq.
- Uranimut naaggaarluinnarneq siorna illuinnaasiortumik paasisitsiniaasoqareerluni Inatsisartunit atorunnaarsinneqarpoq. Uranimik piiaanerup avatangiisinut pinngortitamullu kingunerisinnaasai pillugit siammasissumik paasisitsiniaasoqarnissaa pisariaqarpoq. Aamma atomip nukinga atorlugu sakkussianik ingerlatitsisarnerit pillugit, Mikkel Myrup oqarpoq.
Avatangiisinik illersuiniaqatigiiffiit taakkua sisamat isumaqarput Kuannersuit pillugit tusarniaaqqaarnerit unitsinneqartariaqartut paasissutissat - illersuiniaqatigiiffiit najoqqutaralugit - amigarmata illuinnaasiorlutillu:
- Ilaatigut Sara Olsvigip (Inuit Ataqatigiinni siulittaasoq, aaqq.) uranimik piiaanerup kingunerisinnaasai pillugit paasisitsiniaanissaq piumasarisimasaa isornartunik imaqarnissaa anguniarlugu peqataaffigerusupparput, Mikkel Myrup Avatameersoq oqarpoq.