endelig
Avatangiisinik illersuiniaqataasoq Ruslandimit angerlarsinnaalerpoq
Suli ilisimaneqanngilaq aquttunngorniaq Anne Mie Roer Jensen qaqugu Københavnimut tikissanersoq, taamatut paasissutissiivoq Greenpeace
Qallunaaq Greenpeacemit akerliuniaqataasartoq Anne Mie Roer Jensen aallarnissamut akuersissummik tunineqarsimavoq Danmarkimullu angerlarsinnaalerluni.
Tamanna qaqugu pissanersoq ilisimaneqanngilaq, Greenpeace paasissutissiivoq.
Greenpeacemi iliuuseqartarnermut pisortaq Birgitte Lesanner oqarpoq Anne Mie Roer Jensenip nammineq aalajangissagaa qaqugu angerlarusunnerluni.
Aamma atuaruk: Ruslandip qallunaamut unnerluussunni taamaatiinnarpaa
Anne Mie Roer Jensen piumassuserinngisaminik qaammatini pingasuni Ruslandimiissimavoq, ilaatigut Murmanskimi Skt. Petersborgimilu parnaarussaaqqasimalluni, ilaatigullu piffissami sivikitsumi Skt. Petersborgimi iperagaaqqasimalluni.
– Anne Mie Roer Jensenip nammineq aalajangissavaa qaqugu angerlassanerluni. Aallarnissamulli akuersissummik tunineqareermat billetsimik pisiniarnissaq kiserngorukkaluarpoq, Birgitte Lesanner Ritzau-mut oqarpoq.
Taassumali naatsorsuutigaa qallunaaq akerliuniaqataasoq ulluni qaninnerpaani Danmarkimut tikissasoq.
Anne Mie Roer Jensen Greenpeacemit akerliuniaqataasut 30-t ilagaat septembarip 18-ianni russit sakkutuuinit immikkut ilinniarsimasunit tigusarineqartut, taakkua helikopterit atorlugit akerliuniat umiarsuaat Arctic Sunrise, russit qilleriviannut akerliuniartoq, ikkivigimmassuk.
Tamanna pivoq nunat tamalaat imartaanni.
Umiarsuaq Murmanskimut kalinneqarpoq tassanilu akerliuniat parnaarunneqarlutik. Kingorna Sankt Petersborgimut nuunneqarput.
Akerliuniat parnaarusimaneqarput, aallaqqaammullu imaani ujajaaniartutut unnerluunneqarlutik, tamannalu kingorna perulluliornermut allanngortinneqarpoq, Ruslandimi sivikinnerusumik pillaataasartumut.
Pisimasup ingerlanerani Hollandip, Arctic Sunrise-p nalunaarsortiffigisimasaata, Ruslandi Den Internationale Havretsdomstol-iannut (Nunat tamalaat Imaanik piginnittussaanermut eqqartuussiviannut) maalaarutigaa.
Hollandimiut piumasaraat umiarsuaq russinit tunniunneqassasoq akerliuniallu qularnaveeqqusiilluni iperarneqassasut, tamatumanilu eqqartuussivimmi eqqartuussisut 21-it ilaasa 19-init ilalerpaat.
Akerlinianulli iluaqutaasumik russit saamaassinermut inatsisiliorput. Samaassinermut inatsit russit inatsisartuinit Dumaen-imit sapaatip akunnera qaangiuttoq akuersissutigineqarpoq, Anne Mie Roer Jensenimullu akerliunianullu allanut unnerluussutit taamaatiinnarneqarput.