Avannaata Qimussersua
Avannaata Qimussersua tv-kkut toqqaannassaaq
Qimussillammaat 36-it Avannaani qimussimik sukkaneqqusaatilerput
Ilulissat illoqarfiata tv-qarfia Arctic TV KNR Avannaani sulisut suleqatigalugit Avannaata Qimussersuanik toqqaannartumik arfininngorpat aallakaatitsissamaalerpoq. Aallarnermi tikinnermilu toqqaannartumik malinnaasoqarsinnaassaaq.
Atuaruk: Umiarsuaq qimminik usivoq
Avannaata Qimussersuani tukkaniuttut Ilulissani arfininngormat ullup qeqqanut aallassapput qimussillammaat 36-it tassani peqataassallutik. Arlaleriarluni Avannaata Qimussersuani ajugaasareersoq aamma siorna ajugaasoq Jørgen Kristensen sukkaniutissaareermat nutaamik Avannaata Qimussersuanngortoqartussaavoq
- Jørgen Kristensenili toqqaannartumik aallakaatitsinissami peqataassaq sukkaniuttut ingerlaarfissaat isiginnaartunut nassuiassallugu. Ilanngullugu aamma nassuiarumaarpaa sukkaniunnermi suut aalajangiisuusinnaanersut, Arctic TV-mi aqutsisoq Palle Jeremiassen Sermitsiaq.AG-mut oqarpoq.
Qamutit pingaarutaat
Sukkaniuttussat illoqarfiup ungatinnguani Narsarsuarmiit aallassapput qaqqaq Akinnaq orneqqaassallugu. Taanna sivingaqisumik majoqqaqarpoq taannalu qaangerunikku maninnermumaakkut timmut ingerlaassallutik.
- Aallarfiup nalaani assiliivinnik inissiinniarpugut sukkaniuttut siornginiit tunuaniillu isiginnaarneqarsinnaasunngorlugit. Akinnap qaavani aamma assiliiveqassaq sukkaniuttut aanngarnissaannut assiliisussamik, Palle Jeremiassen oqarpoq.
Piffissami sivisujaami sukkaniuttut assiliiviit angumasaata avataaniissaapput. Taamaammat ilanngutassianik Arctic TV piareersaasimavoq peqataasut ilisaritinneqassallutik. Aamma meeqqat pingasunngornermi Avannaata Qimussersuaararnerannit ilanngutassiamik takutitsisoqarumaarpoq.
- Ilanngutassiat arlaanni aamma oqaluttuarineqarmaarpoq qamatit atorneqartartut assigiinngissusaat aamma qimmit qimuttut aalisarnermi atortut sukkaniunnermilu atorneqartartut assigiinngissusaat nassuiarneqassalluni, Palle Jeremiassen oqarpoq.
Sukkaniuttut apuuffimmut arfininngorpat nalunaaqutaq marlut eqqaanni apuutissangatinneqarput.
Avannaata Qimussersua pillugu aallaaserisat uani atuakkit