kommunit avinneqarnerat
Avannaata Kommuniata illoqarfiit akisussaaffeqarnerulersippai
Qaasuitsup Kommunia innuttaasuminit sakkortuumik uparuarneqartarsimavoq kommunimi oqartussaaqataanermik annaasaqarsimaneq pillugu. Aaqqiissutissamillu borgmesterinngortussaq suliaqarsimavoq
- Ilulissani, Uummannami, Upernavimmi aammalu Qaanaami illoqarfiit siulersuisuinik pilersitsissaagut, akisussaaffeqarnerulerlutik aningaasaqarnerminnik aqutsinerulissapput.
Avannaata Kommuniani borgmesterinngortussaq, Palle Jerimiassen (S), Sermitsiaq.Ag-mut oqarpoq.
Ilanngullugu oqaatigaa kommunit nunaqarfii aamma akisussaaffeqarnerulissasut.
- Aamma kommunalbestyrelsimi nunaqarfinnut ataatsimiititaliaq pilersissavarput, tassani nunaqarfiit siunnersuuteqartarsinnaassallutik, Palle Jerimiassen erseqqissaavoq.
Oqartussaaqataaneruneq
Taamaammat isumaqarpoq kommunimi qanimut oqartussaaqataaneq pitsaanerulissasoq. Oqaatigaalu illoqarfiit ataasiakkaat siunissami akisussaaffeqarnerulissasut.
- Aalajangiinerit Qaasuitsup Kommuniata qiutiusumik allaffeqarfianinngaanneerput , ingerlatsivik allaffimmi pissutsinik tunngaveqarpallaarsinnaasarpoq. Tamanna allanngorteriarparput akisussaaffiit agguaannerullugit. Oqartussaaqataanerummi annikillisinneqangaatsiarsimanera kommunip innuttaasuinit isornartorsiorneqartarsimavoq, tamannalu massakkut iluarsiivigeriarparput, taanna oqaluttuarpoq.
Taassuma nuannaarutigaa ikaarsaariarnermi ataatsimiititaliami ilaasortat suliami suleqatikkuminarsimanerat.
- Kommunimut qinersinerup kingorna ataatsimiititaliamit qanimut suleqatigiittarsimavugut. Oqaatigisinnaavaralu piffissami aggersumi kommunitsinni qanoq suleqatigiinnissarput isumaqatigiissutigisimangatsigut. Aningaasaqarneq pillugu ataatsimeeqqammerpugut, malugisinnaavara kommunalpolitikkerit partii tunuliaqutartik pinnagu kommunimut kivitseqataarusuttut, Palle Jerimiassen oqarpoq.