Avannaata Kommuniani borgmesterip mittarfissaq nuannaarutigigaa
Avannaata Kommuniani borgmesteri, Palle Jerimiassen, mittarfissat pillugit Inatsisartuni sisamanngormat aalajangertoqarmat nuannaarpoq. Ineriartortoqalerpoq, taanna isumaqarpoq.
Inatsisartut mittarfiit pillugit sisamanngormat aalajangermata, tamanna Kalaallit Nunaata ineriartornissamut pisariaqartitaanik tunngaveqarpoq. Palle Jerimiassen (S), Avannaata Kommuniani borgmesteri tusagassiutinut nalunaarutimini allappoq.
- Aaliangerneq nunatta oqaluttuarisaaneranut ilanngunneqartussaavoq. Ullumikkumut nunatta mittarfitsigut attaveqaatai amerikamiut sakkutooqarnikkut pisariaqartitaannik aallaaveqarnikuupput. Inatsisartut sisamanngormat aalajangernerminni nunatta ineriartornissamini pisariaqartitai tunngavigalugit aalajangiisoqarpoq, Palle Jerimiassen allappoq.
Takornariat amerlissapput
Palle Jerimiassenip miserratigisinnaanngilaa “nunatsinniit nunatsinnullu angalassartut qiviarutsigit angalasartut amerlanersaat Nuummiit aallaaveqarmata”.
Angalanerilli amerlanerit sulinermut attuumassuteqarput, tikkuarpaa, aamma Danmarkimiit Nuummut angalanerit.
Tamanna Nuummi imarpik qulaallugu mittarfeqarnissamik pisariaqartitsisoqarneranik ersersitsivoq. Ilulissalli aamma imarpik qulaallugu mittarfeqarnissamik pisariaqartitsivoq, taamaammat mittarfiup 2.200 miiterisut takitigilernissaanut Inatsisartut aalajangernerat inissaminiippoq, allassimavoq.
- Nunarsuarmioqativut Danmark aqqusaaqqaanngikkaluarlugu Ilulissanut tikissinnaaalissapput. Tamanna takornariaqarnerup annertuumik ineriartorteqqinnissaanut periarfissaassaaq.
Tamannaavorlu nunatta aningaasanik nutaanik isaatitsilernissaanut periarfissiinera tamatta atorluartariaqagarput, nunatsinnut pitsaanerpaaq anguniarlugu, Palle Jerimiassen tusagassiutinut nalunaarummini ilanngullugu allappoq.
Aalisakkat puigornagit
Ilulissanili mittarfiup tallineqarnerani takornariaqarneq kisimi siuarsarneqassanngilaq. Naluneqanngitsutut Ilulissat qaleraleqarfissuuvoq, mittarfillu tallineqarpat aalisakkat piumaneqarluartut naliginut tamanna pitsaasumik sunniuteqarsinnaavoq.
- Aqqut pilertussaq nutaaq aalisakkanik naleqarnerujussuarmik isaatitsilernissatsinnut periarfissiissooq. Aalisartortatsinnut, nunami suliffilinnut periarfissanillu nutaanik pilersitsissooq. Nunatta siunissaanik qaamanerulersitsissalluni, Palle Jerimiassen (S) oqarpoq.
- Inatsisartut mittarfissualiornissanut aaliangernerat nunatsinni innuttaaqataasunut tamanut nunannaarfissaavoq periarfissanik nutaanik ikitsivoq. Assakaasut siumut aallarsartinnissaannut tamatta piareerpugut.