puisinniarneq
Avannaani puisit piumaneqarluartut sammineqalersut
Ukiup sikua nallorpoq imaatigullu piniarniarneq ajornannginneruleqqimmat Qeqertarsuup Tunuani piniartut sikuni natsernik piumaneqarluartunik piniarneq aallutilerpaat. Tamannali piniartunut tamanut iluanaarutaanngitsoq, piniartut Aasiammiut Kangerluup paavanut piniariartut misigaat
Upernaaq pingortitamik uummaarinnerulersitsisutut ippoq, silaannaallu kissarnerulernera ilutigalugu nalunaaqutaq kaajallallugu qaamasaleqqimmat, Avannaani inuit ukiorlussiorsiorsimasut qiimanerulersutut ipput. Qupaloraarsuit, qeerlutuut, nerlerit aasallu timmiai imarmiut allat tikerarsimalereertut qallornerat aasarpalaartumik tusarsaajualereerpoq.
Ukiup sikua nallorlunilu aattulermat inuussutissarsiutigalugu aamma saniatigooralugu piniartunut angalaniarneq ajornannginnerulermat, puisinniat angalasalerput natsiit piumaneqaqisut sikuni piniarlugit. Natsiit ukiup taamaalinerani piumaneqarluartarmata piniartut sikunut ilaatigut ungasissumiittunut ullut arlerlugit piniariarsinnaasarput.
Qeqertarsuup illoqarfiata kitaa avataalu ukiup taamaalinerani natseqassutsimigut ilisimaneqarluartoq, piniartunit Qeqertarsuup Tunuani sumiiffinniit assigiinngitsuniit aggertunit ornigarneqarluartarpoq. Sikullu avannamut avammullu ingerlaarnerat ilutigalugu natsiit akullariartulertarmata, tamanna sioqqullugu piffissap sivisunngitsuinnaap ingerlanerani umiatsiaaqqamik angallatinillu anginerusunik natsernik piniarneq annertuumik ingerlanneqalertarpoq.
Allaaserineqartoq tamaat Tamanut Avannaanimi atuarneqarsinnaavoq. Qaasuitsup Kommuniani pisut allat aamma aviisimi atuarneqarsinnaapput. Aviisi akeqanngitsumik ataani aaneqarsinnaavoq: