Naturbeskyttelse
Avannaani piffiit arfinillit apersuiartorfigienqassapput
ICC-p Avannaata imartaata illersorneqarnissaa pillugu kommissionia qanittumi kitaata avannarpasissuanut apersuiartussaaq
Nunavumi nunaqarfimmiut 2016-ip upernaani oqaloqatigereerlugit, Pikialasorsuarmut kommissioni septembarip aallartinneranit Avannaani Siorapalummit kujammut Upernavik tikillugu piffinni arfinilinni oqaloqatiginnikkiartornerminik aallartitsissaaq.
Avannaata imartaani tamaani pisuussutinik uumassusilinnik pinngitsoorneqarsinnaanngitsunik atuinermik ilisimasanik katersilluni inunnik imartami illuatungeriillutik najugaqartunik apersuinissaq siunertaralugu Pikialasorsuarmut kommissioni pilersinneqarpoq.
Avannaata imartaa imaavoq immap sikuanik unguneqaqqasoq. Taanna nunarsuup aavannaani annersaavoq killingusaallu avannaani nerisaqaqatigiiaani tukerfiunersaalluni.
Immikkut ilisimasallit takkupput
Tikeraagassani arfinilinni Pikialasorsuaq-kommissionip suliai paasissutissiissutiginiarlugit, innuttaasullu isumaannik katersiniarluni tamanut ammasumik ataatsimiinnerit ingerlanneqartassapput.
Tamatumalu saniatigut avannaata imartaa, imarlu tassunga kalluuttoq pillugu immikkut ilisimasallit ataasiakkaat apersorneqarnerat ingerlanneqassaaq, tamannalu immiunneqassaaq.
Kommissionip nunatsinni sulinera ICC Kalaallit Nunaat KNAPK-lu suleqatigalugit piviusunngortinneqarpoq.
Kommissionimi uku ilaasortaapput: Okalik Eegeesiak, international kommisæritut, taanna ICC internationalimi siulittaasuuvoq, Eva Aariak, siusinnerusukkut Nunavumi naalakkersuisut siulittaasorisimasaat, Canadamit kommisæritut toqqagaq kiisalu naalakkersuisut siulittaasorisimasaat Kuupik Kleist, nunatsinnit kommisæritut toqqagaq.
Paasissutissani innuttaasunik ataatsimiititsinissat pillugit paasissutissat erseqqinnerusut takukkit