Ukkusissat
Avannaani nunaqarfinni nioqqutissat amigaatigineqangaatsiartut
Ukkusissani innuttaasut nunaqarfimmi Pilersuisup pisiniarfiutaanut pisiniaraluarunik qinigassaqarpalaanngillat. Tamanna nunaqarfimmi innuttaasup Thala K. Petersenip ernumanartoqartippaa. Avannaani nunaqarfinni pisiniarfiit 18-it nioqqutissanik amigaateqarnerat KNI-imi pisiniarnermut pisortaq paasissutissiivoq.
- Nioqqutissat aatsaat taama annertutigisumik amigaataanerat takuara, Uummannap pigisaani Ukkusissarmiu Thala K. Petersen, Sermitsiaq.AG-mut oqarpoq.
Pisiniarfimmi toqqagassaqarpiannginnera, taassuma kamassutigaluguli ernumassutigaa.
- Uagutsinnut toqqissisimannggilaq. Kaffeqanngilaq, naatitaqanngilaq, naatsiiaqanngilaq sukkoqaraniluunniit qallersuutissallu ikittuaraallutik. Sapaassuit aallaqqaataani ilaqutariit nereqatigiilerpata nerrivimmi amigaateqartussaassaaq, taanna oqarpoq.
Angalaneq ulorianartoq
Thala K. Petersen ippassaq sisamanngornermi, Pilersuisumiissimavoq nioqqutissarpassuillu amigaataasimallutik. Ilisivinni naatitaqaranilu naatsiiaqanngilaq.
Thala K. Petersenilu Uummannamut qallunniarsinnaanngilaq.
- Ukiup taamaasinerani angalaneq uloriarnarpoq, amigaatigullu pisariaqartitagut imaasiallaannaq Uummannamut pisiariartorsinnaanngilagut. Decembarip aallartilaarnerani umiarsuaq nunaqarfiliartartoq naggammik tikittussaavoq. Ukiup tulliani peqqumaatissat siulliit aatsaat maajip naalernerani aatsaat tikiunneqassapput, taanna oqarpoq.
Pilersaarummik nutaamik ujartuisoq
Nioqqutissanik amigaateqarneq nunaqarfimmi avissaartuuffiuvoq. Kina akisussaasuuva. Apeqqut tamanna innuttaasut akornanni oqallisigineqarpoq.
- Nunaqarfimmi naammagineqanngeqaaq, tassani pisiniarfiup siulersuisui nioqqutissaqarpiannginneranik pisuutinneqarlutik, allallu Royal Arctic Line kamassutigeqqallugu. Nunaqarfitsinni nutaamik pilersaarusiortoqarnissaat neriuutigeqaarput. Massakkut ingerlanerluttoqarpoq, Thala K. Petersen oqarpoq.
Royal Arctic Linekkut nassiussat
KNI-imi indkøb- og logistikchef Kurt Lauritsenip Sermitsiaq.AG-mut uppernarsarpaa, nunaqarfinnut tamanut nioqqutissanik nassiussiniarnerup ajornartorsiutaanera.
Taassuma oqaatigaa, Royal Arctic Line-p nunaqarfinnut nassiussiniarnera kinguaattooqqanera pissutaasoq.
- Nioqqutissanik piniartarnerput naliginnaasumik ingerlapparput, Royal Arctic Line-lu kinguaattooqqanermut pissutaavoq, Kurt Lauritsen oqarpoq.
Nunaqarfiit eqqorneqangaatsiartut
Taassuma oqaatigaa, Avannaani Pilersuisup pisiniarfiutai 18-it tamangajammik nassiussanik ajornartorsiuteqartut.
- Ukkusissat nunaqarfinni eqqugaanerpaanut ilaagunarpoq. Nunaqarfiillu Upernaviup Uummannallu eqqaaniittut nioqqutissat kingusinnerusukkut tigussavaat. Nioqqutissat apuunneqarnissaat pillugit ullut tamarluinnangajaasa Royal Arctic Line kimigiiserfigisarparput. Soorunami nioqqutissat piffissaq eqqorlugu apuunneqartannginnerat utoqqatsinarpoq, ajornartorsiullu tamanna ukioq tamakkingajallugu ajornartorsiutigisimavarput, KNI'mi indkøbs- og logistikchef oqarpoq.
Royal Arctic Line-p nioqqutissat apuunneqarnissaat KNI-mut neriorsuutigineqarsimasoq, Kurt Lauritsenip oqaatigaa.
- Soorunami nunaqarfimmi nioqqutissat taama annertutigisumik amigaataanerat naammaginngilarput, aammami pitsaanerpaanngilaq. Paasissutissaatigut naapertorlugit decembarip ulluisa aappaani umiarsuaq nunaqarfiliartartoq tikittussaavoq, Kurt Lauritsenip oqaatigaa. Aasiaanniillu Ukkusissanut nassiussassarpassuaqartoq ilanngullugu oqaatigaa.