Pinngortitaleriffik

Avannaani appanik annertuumik misissuineq

Pinngortitaleriffimminngaanneersut februarip qaammataani appat pillugit Avannaani najugaqarfinni assigiinngitsuni innuttaasunut ataatsimiisitsillutillu apersuissapput

Pinngortitaleriffimminngaanneersut februarip qaammataani aappat pillugit innuttaasunut ataatsimiisitsillutillu apersuissapput.

Najugaqarfiit tikinniarneqartut tassaapput Kullorsuaq, Nuussuaq, Tasiusaq Upernavillu, Pinngortitaleriffik tusagassiuutinut nalunaarummi paasissutissiivoq.

Innuttaasunik ataatsimiititsisarnerni Pinngortitaleriffiup appat pillugit misissuisarnerinik paasititsiniaasoqassaaq, saniatigut biologi Ph.D.-nngorniartorlu, Aili Lage Labansen, ilinniaqqinnerminut atatillugu Upernaviup pigisaanilu appat pillugit najugaqartut ilisimasaat paasiniaavigissavai.

Malunnaatilimmik ikileriartut

- Upernaviup avannaaniittut appat ineqarfii Apparsuit Kippakulu Kalaallit Nunaata kitaani appat ineqarfiini anginerpaapput, Avanersuarmi appat ineqarfii suli anginerusortaqartut eqqaassanngikkaanni. Ineqarfik Kippaku appat amerlassusiisigut aalaakkaasumik inissisimavoq, uffa ineqarfik eqqannguaniittoq Apparsuit ukiuni kingulliunerusuni malunnaatilissuarmik ikiliartorfiusoq. Pissutsit taamaattorpiaat, ilaat ikiliartorfiusut ilaalli aallakkaasumik inissisimasut, taamaannerinut peqqutaasut paasiniarlugit Aili Lage Labansen Ph.D.-nngorniummik suliaqartoq, nalunaarutigineqarpoq.

Appat piaqqiornerisa nalaani biologit misissuiartorlutik ineqarfinnut takkukkaangamik piffissami sivikitsuinnarmi misissuinernik suliaqartarput, sumiiffimmilu najugaqartut ukiup annersaani pissutsit eqqaminni pisut malinnaaffigisinnaasarpaat.

Taamaattumik paasissutissat allaanerusut appaqassutsillu itinerusumik paasisaqarfiginissaanut pingaaruteqartunik ilisimasanik sumiiffimmi najuqartut ilisimasaqarput. Tamanna peqqutaalluni biologi Aili Lage Labansen taavanimiunut kaammattuivoq appanut tunngatillugu ilisimasaminnik apersuinernut peqataanermikkut imaluunniit najugaqarfinni tikinneqartussani innuttaasunik ataatsimiititsisarnissani peqataanermikkut tunniussaqaqqullugit.

Misissuinerit

- Kalaallit Nunaanni appat ineqarfii amerlanerpaartaat ikiliartorfiupput, aammali aalakkaasumik inissisimasunik peqarpoq, Upernaviup avannaaniittut Avanersuarmiittullu amiakkuulermata. Upernaviup avannaatungaaniittut ineqarfiit Kippaku Apparsuillu immikkut soqutiginaateqarput, imminnummi qanittuararsuullutik inissisimammata, taanna erseqqissaavoq.

Apparsuarnili appat piaqqisartut amerlassusiat ukiuni kingulliunerusuni ukiumut tusindit angusarlugit ikiliartulersimapput. Uffa kujateralaannguaniittoq ineqarfik alla Kippaku taama qanitsigigaluarluni allannguuteqarani aallaakkaasumik inissisimavoq.

- Pissutsit taamaannerat sunik peqquteqarnersoq paasiniarlugu misissuileruttorpugut, neriuppugullu sumiiffinni najugaqartut taama paasiniaanitsinni ikiorsinnaassagaatigut, Aili Lage Labansen nassuiaavoq.

Appa Kalaallit Nunaanni timmissani piniakkatut pingaarnerpaatut inissisimavoq, Aililu isumaqarpoq suliniummigut appat pillugit paasisanik nutaanik qulaagaqarsinnaassalluni. Taamaaillluni appat pillugit siunnersuisarnerit piujuartitsiniarnermik tunngaveqartumik appat iluaqutigineqarnerinut tunngatillugu ilisimatuussutsikkut siunnersuisarnernut pitsanngorsaataassallutik.

Powered by Labrador CMS