assit takukkit
Avannaani amaqqumik aallaannittoqaqqittoq
Amaqqut marluk nunaqarfiup Siorapaluup eqqaanut pisimapput, kommunefogedillu aappaa aallaasariaqarsimavaa
Amaroq piniaqqusaanngilluinnarpoq, taamaakkaluartoq Avannaani septembarimit maannamut marluk aallaaneqareerput.
Kingullermik januaarip 13-ni nunaqarfiit avannarpasinnersaanni Siorapalummi amaroq aallaaneqarpoq, kingornalu amaroq alla aamma takuneqarsimavoq.
- Taanna amaroq piffimmit qimaatinniarsarineqareerluni pineqartoq pisarineqarpoq, Amalie Jessen Sermitsiaq.AG-mut uppernarsaavoq.
Pisariaqartillugu illersortariaqarnermi toqunneqartoq
Taanna Aalisarnermut Piniarnermullu Naalakkersuisoqarfimmi malittarisassanik malinnittoqarnersoq nakkutiginnittuuvoq, aamma nunaqarfiit avannarpasinnersaanni.
- Amaroq illut aamma qimmit akornanni arlaleriarluni takuneqarsimavoq, tumaanillu arlaleriarluni takunnittoqarluni. Pissuteqartumik kommunefogedimit toqunneqarpoq.
Uumasut ulorianartutut nalilerneqarsimappata, kommunefogedit nunaqarfinni innuttaasut illersorniarlugit politiitut pisussaaffeqarput.
Amaroq arsaarinnissutaasoq
Naak aamma amaqqut uumasut inunnik takugaangamik qimaanerarneqartaraluartut, imaluunniit qaqutigoortumik ataasiakkaat qanillillutik attorneqarsinnaagaluartut, taanna Siorapalummiittoq amaroq ulorianartuusimassaaq, Naalakkersuisoqarfik naliliivoq.
- Pisariaqartumik illersortariaqarluni illoqarfiup iluani toqutsineq pivoq, naalakkersuisoqarfimmi pisortaq oqarpoq.
Amaqqut arlallit
Nunaqarfimmi aamma ulluni januaarip 16-ni aamma 17-ata kingorna, amaqqumik allamik tumaanillu takunnittoqarsimavoq. Kingornali nunaqarfimmi taanna takoqqinneqarsimanngilaq, qimaasimassagunarlunilu.
Septemberimi 2015-imi piniartup Qillaq Danielsenip amaroq Qaanaap eqqaani aallaavaa. Taamatut iliorneq assigiinngitsorpassuarnik qisuariaateqartoqarneranik kinguneqarpoq.
Atuaruk: Qaanaap eqqaani amaroq pisarineqarpoq
Piniartup siullermik Sermitsiaq.AG-mut oqaluttuarnermini amaroq uumasoq nungoratarsinnaasoq sooq aallaaneqartariaqarneranik oqaaseqarpallaanngilaq. Tusagassiortumilli allaaserinnittumut kingusinnerusukkut apersorneqaqqikkamik, meeqqani piffimmiittut ulorianartorsiorpallaarneri pissutigalugit amaroq allaasimallugu nassuiaatigaa.
Atuaruk: Meeqqani illersorniarlugit Qaanaami angutip amaroq aallaavaa
Atuaruk: Amaqqumik pisaqartoq politiinit apersorneqarpoq