Avannaa: Ineqarnermut akiliut taama qaffatsigissaaq

Qaasuitsup Kommuniata aamma pisariaqarsoraa A/S Inissiaatileqatigiit Inip inissiaataanik attartorneq akitsortariaqartoq iluarsaassinnerit akissaqartikkumallugit. Maanna paasinarsivoq agguaqatigiisillugu akitsuineq Qasigiannguani, Aasianni Upernavimmilu qaffasinnerusussasoq siunnersuutigineqarpoq.

Atuaruk: Ini: Taamaattumik akit qaffassapput

A/S Inissiaatileqatigiit Inip inissiaataanik attartornermut akiliut agguaqatigiisillugu 2,5 procentimik aappaagu qaffassaaq. Taamaattoq agguaqatigiisillugu qaffariaat Aasianni, Qasigiannguani aamma Upernavimmi 5 procentiussasoq, Qaasuitsup Kommuniani kommunalbestyrelsep ataatsimiissutissaani allaqqavoq.

Atuaruk: Inimut akiliutit 10 procent angullugu qaffaqqilerput

Aasianni Ilulissanilu najugaqarfiit marlunnut avinneqarsimapput Aasiannilu najugaqarfiup aappaani qaffariaat agguaqatigiisillugu 5 procentiussaaq aappaani 2 procentiusussasoq siunnersuutigineqarpoq.

- Aasianni Qasigiannguanilu najugaqarfiit missigersuutaat kommunet pisoqqat atorallarmatali appasippallaanik ineqarnermut akiliuteqarfiusarsimammata aningaasatigut angummatsinniarnerat kinguaattoorpoq, Qaasuitsup Kommunia allappoq.

Qaasuitsup Kommunia naammagittaalliorfineqartarsimavoq inissiat aserfallatsaalineqartannginnerat pillugu. Kommune taamaattumik isumaqarpoq ineqarnermut akiliutip qaffannissaa pisariaqartoq iluarsaatassat angummaffigineqassappata.

Aajuku qaffariaatissatut siunnersuutit illoqarfikkaartumik:
Kangaatsiaq: 2 procent
Aasiaat: 2 procent
Aasiaat: 5 procent
Qasigiannguit: 5 procent
Ilulissat: 2 procent
Ilulissat: 3 procent
Qeqertarsuaq: 2 procent
Uummannaq: 2 procent
Upernavik: 5 procent
Qaanaaq: 0 procent

Kommunalbestyrelse sisamanngorneq oktoberip qulingat ataatsimiittussaagaluarpoq tamannali kinguartinneqarpoq telemut attaveqaatit ajoquteqarnerat pissutigalugu